மாணவர் முரசு
இ-பேப்பர்
போய்சி: சிங்கப்பூர் குடியரசு ஆகாயப்படையின் லெஃப்டினென்ட் ஜான் இங்கிற்குப், போர் விமானியாக வேண்டும் என்ற கனவு இளம் வயதிலேயே மலர்ந்தது.
கணினி விளையாட்டுகளில் தொடங்கிய ஆசை, வாழ்க்கைக் கனவாக மாறி லட்சியமாகக் கனிந்தது.
சிங்கப்பூர் தற்காப்பு அமைச்சின் ‘பீஸ் கார்வின் 5’ (PC V) திட்டத்தின்கீழ் அமெரிக்காவின் ஐடஹோ மாநிலத்தில் திரு இங் பயிற்சி பெற்று வருகிறார். இத்திட்டத்தின்கீழ், சிங்கப்பூர் ஆகாயப்படை வீரர்கள் வெளிநாடுகளில் பயிற்சி பெறுவர்.
திரு இங், ஐடஹோவின் மவுன்டன் ஹோம் ஆகாயப்படைத் தளத்தில் 2023 ஆகஸ்ட் முதல் பணியாற்றி வருகிறார். தற்போது தம் மனைவி, கைக்குழந்தையுடன் வசிக்கும் இவருக்கு வயது 26. இளவயதிலேயே அவர் பல பொறுப்புகளைச் சுமக்கிறார்.
தமது போர் விமானக் கனவு குறித்து தமிழ் முரசின் கேள்விக்குப் பதிலளித்த திரு இங், கணினி விளையாட்டுகளில் நன்மைகளும் இருப்பதைச் சுட்டினார்.
“நான் ‘கவுன்டர் ஸ்டிரைக்’ விளையாடுவேன். என்னைப் பொறுத்தவரை, அது குழு உணர்வையும் மூளைச் செயல்பாட்டு ஆற்றலையும் மேம்படுத்துகிறது. கணினிச் சுட்டியை இயக்கி கைகளையும் கண்களையும் ஒன்றை மற்றொன்றுக்கு ஏற்றவாறு இயங்கச் செய்வது அதில் அடங்கும்.
“நான் சிறந்த வழக்கறிஞராகவோ பொறியாளராகவோ உருவெடுத்திருக்க அதிக வாய்ப்பிருந்திருக்காது. அவற்றுக்குத் தேவையான திறன்களைக் கணினி விளையாட்டுகள்மூலம் வளர்த்துக்கொள்ள முடியாது.
“தற்போது எனது பணிக்குத் தேவையான மூளைச் செயல்பாட்டு ஆற்றலை வளர்க்க கணினி விளையாட்டுகள் உதவின,” என்றார் லெஃப்டினென்ட் இங்.
தொடர்புடைய செய்திகள்
அதேவேளை, பள்ளிக் கல்வியில் கவனம் குறையாமல் பார்த்துக்கொள்ளுமாறும் அவர் மாணவர்களுக்கு அறிவுரை வழங்கினார். ஐடஹோவில் அண்மையில் நடந்து முடிந்த சிங்கப்பூர் ஆயுதப்படையின் ‘எக்சர்சைஸ் ஃபோர்ஜிங்’ பயிற்சிக்கு நடுவே திரு இங்கைச் செய்தியாளர்கள் நேர்கண்டனர்.
பயிற்சிக்காக சில காலம் அமெரிக்காவில் வசிக்கும் இவருக்கு ‘ஹொக்கியென் மீ’ போன்ற சிங்கப்பூரின் பிரபல உணவு வகைகளைச் சாப்பிட முடியாதது ஒரு குறையாக இருக்கிறது. ஆனால், இவ்வளவு பெரிய பொறுப்பை நிறைவேற்றுவதையும் லட்சியத்தை அடைவதையும் பார்க்கும்போது அது பெரிய குறையன்று என்கிறார் அவர்.