மன அழுத்தத்தில் தவிக்கும் ஏர் இந்தியா விபத்தில் உயிர் பிழைத்த தனியொருவன்

புதுடெல்லி: குஜராத்தில் அகமதாபாத்தில் ஜூன் 12ஆம் தேதி நடந்த ஏர் இந்தியா விபத்தில் 241 பேர் உடல் கருகி பலியாகினர்.

அவ்விபத்தில் பிரிட்டனைச் சேர்ந்த 40 வயது விஸ்வாஷ்குமார் ரமேஷ் மட்டுமே உயிர் பிழைத்தார். 

அவரை ‘அதிர்ஷ்டசாலி’ என அனைவரும் அழைத்தாலும், தனது தம்பி அஜய் அந்த விபத்தில் உயிரிழந்ததால் தாம் அனைத்தையும் இழந்துவிட்டதைப் போன்று உணர்வதாகத் திரு ரமேஷ் கூறினார்.

பிபிசி ஊடகத்திற்கு அவர் அளித்த நேர்காணலில், பிரிட்டனில் உள்ள தனது வீட்டிற்குத் திரும்பிய பிறகும் அவரால் இயல்பாகப் பேசவும் செயல்படவும் முடியவில்லை என அவர் தெரிவித்தார்.

மேலும், அதிர்ச்சிக்குப் பிறகான மன அழுத்தத்துடன் போராடி வருவதாகவும் சொன்னார்.

“நான் எனக்கு முதுகெலும்பாய் இருந்த என் சகோதரனை இழந்துவிட்டேன். எங்கள் குடும்பத்திற்கு மிகவும் ஆதரவாய் இருந்த அவரை இழந்ததை எனது குடும்பத்தினரால் ஏற்றுக்கொள்ள முடியவில்லை. விபத்துக்குப் பிறகான இந்தப் பாதையைக் கடப்பது எனக்கும் எனது குடும்பத்திற்கும் மிகவும் சவாலாக உள்ளது,” என வருத்தத்துடன் கூறினார் திரு ரமேஷ்.

கடந்த நான்கு மாதங்களாக, தனது தாய் தினமும் வீட்டின் கதவுக்கு வெளியே எதுவும் பேசாமல் அமர்ந்திருப்பதாகச் சொன்னார்.

ரமேசுக்கு ஏர் இந்தியா 21,500 பவுண்டுகளை ($36,670) இடைக்கால இழப்பீட்டுத் தொகையாக வழங்கியுள்ளது.

தொடர்புடைய செய்திகள்

ஏர் இந்தியா விபத்து: நேர்மையான, வெளிப்படையான விசாரணை கோரும் விமானியின் தந்தை

அவர் அதை ஏற்றுக்கொண்டாலும், இந்தத் தொகை அவரது உடனடியான தேவைகளைப் பூர்த்தி செய்ய போதுமானதாக இல்லை என்று ரமேஷ் தரப்பினர் கூறுகின்றனர்.