மாணவர் முரசு
இ-பேப்பர்
புதுடெல்லி: சட்டவிரோதமாக மரங்களை வெட்டுவது பேரழிவுகளுக்கு வழிவகுத்துள்ளதாக இந்திய உச்ச நீதிமன்றம் தெரிவித்துள்ளது.
நாட்டின் பல்வேறு பகுதிகளில் ஏற்படும் வெள்ளப்பெருக்கு, நிலச்சரிவுகள் தொடர்பாக விசாரணை நடத்த சிறப்பு புலனாய்வுக் குழு ஒன்றை அமைக்கக் கோரி, உச்ச நீதிமன்றத்தில் வழக்கொன்று தொடுக்கப்பட்டுள்ளது.
இவ்வழக்கை விசாரித்த உச்ச நீதிமன்றத் தலைமை நீதிபதியை உள்ளடக்கிய அமர்வு, மரங்களை வெட்டுவது தொடர்ந்தால் காடுகளே இல்லாமல் போய்விடும் என்று கவலை தெரிவித்தது.
அண்மையில் உத்தராகண்ட், இமாச்சலப் பிரதேசம், பஞ்சாப் உள்ளிட்ட வட மாநிலங்களை கனமழை புரட்டிப் போட்டுள்ளது. பெரும் உயிருடற் சேதங்கள் ஏற்பட்டுள்ளன.
இதைக் குறிப்பிட்ட உச்ச நீதிமன்ற நீதிபதிகள், இமாச்சலப் பிரதேச வெள்ளப் பாதிப்பு தொடர்பாக வெளியான ஊடகச் செய்திகளில் வெட்டப்பட்ட மரங்கள் வெள்ளத்தில் மிதந்து வரும் காட்சிகள் வெளியாகின என்றும் அவை சட்டவிரோதமாக வெட்டப்பட்டு பதுக்கப்பட்ட மரங்கள் என்று ஒருதரப்பினர் கூறுகின்றனர் என்றும் சுட்டிக்காட்டினர்.
மேலும், சட்டவிரோத மரங்கள் வெட்டப்படுவது தொடர்பாக மத்திய அரசும், சம்பந்தப்பட்ட இமாச்சலப் பிரதேசம், உத்தராகண்ட், பஞ்சாப் மாநில அரசுகளும் இரண்டு வாரங்களுக்குள் அறிக்கை தாக்கல் செய்ய வேண்டும் என உச்ச நீதிமன்ற அமர்வு உத்தரவிட்டுள்ளது.
“பஞ்சாப், உத்தராகண்ட், இமாச்சலப் பிரதேசத்தில் ஏற்பட்ட மழை, வெள்ளம் மற்றும் நிலச்சரிவு பாதிப்பு எதிர்பாராதது. இமாச்சலப் பிரதேசத்தில் சட்டவிரோதமாக மரங்கள் வெட்டப்படுவது தெள்ளத்தெளிவாகப் புலப்படுகிறது. இப்படியே சென்றல் இனி காடுகளே இருக்காது. வளர்ச்சிக்கும் சுற்றுச்சூழலுக்கும் இடையே சமநிலையை ஏற்படுத்த வேண்டும்,” என்றும் உச்ச நீதிமன்றம் அறிவுறுத்தியது.
இரண்டு வாரங்களுக்குப் பிறகு இந்த வழக்கு மீண்டும் விசாரணைக்கு வருகிறது.
