வரதட்சணை வழக்கு: நீதி கேட்டு மாமியார் வீட்டின் முன் தேநீர்க் கடை நடத்தும் கணவர்

படம்: ஊடகம்

15 Jun 2025 - 4:59 pm

2 mins read

ஜெய்ப்பூர்: மத்தியப் பிரதேசத்தைச் சேர்ந்த கிருஷ்ணகுமார் தகாத் என்பவர் தன் மீது வரதட்சணை கேட்டுக் கொடுமை செய்ததாக சுமத்தப்பட்ட குற்றச்சாட்டை எதிர்கொள்ள, தன் மாமியார் வீட்டின் முன் தேநீர் கடை நடத்துகிறார்.

தேநீர் கடைக்கும் வழக்குக்கும் என்ன தொடர்பு என்று கேட்பவர்களுக்கு, இதன் மூலம் தமக்கு நீதி கிடைக்கும் என நம்புவதாகச் சொல்கிறார் கிருஷ்ணகுமார்.

இவருக்கும் ராஜஸ்தானைச் சேர்ந்த மீனாட்சி மாளவை என்பவருக்கும் கடந்த 2018ஆம் ஆண்டு திருமணம் நடைபெற்றது.

புதுமணத் தம்பதியர் தேனீ வளர்ப்புத் தொழிலில் ஈடுபட்டனர். ஆனால், இந்த தொழில் சரிவைச் சந்தித்த நிலையில், குடும்பத்துக்குள் புகைச்சல் மூண்டது.

தன் கணவர் வரதட்சணை கேட்டு துன்புறுத்துவதாக காவல்துறையில் புகார் அளித்தார் மீனாட்சி. இதையடுத்து, கிருஷ்ணகுமார் மீது வரதட்சணை வழக்குப் பதிவானது.

நீதிமன்ற விசாரணைக்காக மத்தியப் பிரதேசத்தில் இருந்து ராஜஸ்தானுக்கு அவர் அடிக்கடி வந்துபோக வேண்டிய சூழ்நிலை இருந்தது.

இதையடுத்து, தன் மனைவி தொடுத்த வழக்கை எதிர்கொள்ளவும் பொருளியல் ரீதியில் தன்னை நிலைப்படுத்திக் கொள்ளவும் தேநீர்க் கடையைத் தொடங்க தீர்மானித்தார் கிருஷ்ணகுமார்.

இதற்காக, தன் மாமியார் வீட்டுக்கு எதிரே உள்ள கடையைத் தேர்வு செய்தார் என்பதுதான் இதில் திடீர் திருப்பம். மேலும், தனது கடைக்கு, ‘498 ஏ - தேநீர் நிலையம்’ எனப் பெயரிட்டுள்ளார்.