அமெரிக்காவில் இருந்து திருப்பி அனுப்பப்பட்ட இந்தியர்களிடம் விசாரணை

புதுடெல்லி: அமெரிக்காவிலிருந்து திருப்பியனுப்பட்ட இந்தியர்களிடம் இந்திய காவல்துறை விசாரணை நடத்தி வருகிறது.

அமெரிக்காவில் சட்டவிரோதமாகக் கூறி இந்தியர்கள் 54 பேர் திருப்பி அனுப்பப்பட்டனர்.

அவர்களிடம் முறையான ஆவணப் பத்திரங்கள் இல்லை எனத் தெரிவிக்கப்பட்டது.

அமெரிக்காவில் முறையான விசா இல்லாமல் வசித்து வரும் வெளிநாட்டினரை நாடு கடத்தும் பணியை அதிபர் டிரம்ப் நிர்வாகம் மேற்கொண்டு வருகிறது. இந்தியர்கள் உள்பட பல நாடுகளில் இருந்து வந்தவர்களை அந்நாடு திருப்பி அனுப்பி வருகிறது.

அடுத்தடுத்த கட்டங்களாக இதுவரையில் 2,000க்கும் மேற்பட்ட இந்தியர்கள் அமெரிக்காவில் இருந்து வெளியேற்றப்பட்டுள்ளனர்.

இந்த நிலையில், ஹரியானா மாநிலம் கர்னல் மாவட்டத்தைச் சேர்ந்த 54 பேரை அமெரிக்கா திருப்பி அனுப்பியுள்ளது. அதில், கர்னல் பகுதியைச் சேர்ந்த 16 பேர், கைதலைச் சேர்ந்த 15 பேர், அம்பாலா, குருஷேத்ராவில் தலா 4 பேர், ஜிந்தில் 3 பேர், சோனிப்பேட்யில் 2 பேர், பஞ்ச்குலா, பானிப்பட்,ரோதக், பதேஹாபாத் பகுதிகளைச் சேர்ந்த தலா ஒருவர் என மொத்தம் 54 பேர் அடங்குவர்.

புதுடெல்லி இந்திரா காந்தி அனைத்துலக விமான நிலையம் முனையம் 3ல் அவர்கள் வந்து இறங்கியதாக ஞாயிற்றுக் கிழமை காவல்துறை கூறியது.

இது தொடர்பாக விளக்கமளித்த டிஎஸ்பி சந்தீப், “இந்தியர்களை ஏற்றிக் கொண்டு வந்த விமானம் சனிக்கிழமை டெல்லி வந்தது. அவர்களை டெல்லியில் இருந்து கர்னலுக்கு அதிகாரிகள் அழைத்துச் சென்றனர். அங்கு குடும்பத்தினரிடம் ஒப்படைக்கப்பட்டனர்,” என்றார்.

தொடர்புடைய செய்திகள்

டிரம்ப்பின் வரிப் போரும் சிக்கித் தவிக்கும் திருப்பூரும்

இந்நிலையில் 54 பேரும் அமெரிக்காவுக்கு எவ்வாறு சென்றார்கள் என்பது குறித்து விசாரணை நடத்தப்படுகிறது.

அவர்கள் எந்த வழியில் அமெரிக்காவுக்குள் நுழைந்தார்கள் என்பதும் விசாரிக்கப்படுகிறது.