மாணவர் முரசு
இ-பேப்பர்
ராஞ்சி: ஜார்க்கண்ட் மாநிலம் சாய்பாசா பகுதியில் தலசீமியா பாதிப்புள்ள ஐந்து குழந்தைகளுக்கு ‘ஹெச்ஐவி’ தொற்றுடன் கூடிய ரத்தம் ஏற்றப்பட்டது கடும் அதிர்ச்சியை ஏற்படுத்தியுள்ளது.
அக்குழந்தைகளின் பெற்றோர் இதுகுறித்து புகார் அளித்துள்ளனர். சிறுவர்களுக்கு ரத்தம் அளித்த சதார் மருத்துவமனையில் உள்ள ரத்த வங்கியின் அலட்சியப் போக்குத்தான் இந்நிலைக்கு காரணம் என அவர்கள் குற்றஞ்சாட்டியுள்ளனர்.
ராஞ்சியைச் சேர்ந்த ஏழு வயது சிறுவனுக்கு அண்மையில் தொற்று உள்ள ரத்தம் செலுத்தப்பட்டுள்ளது. பின்னர் அச்சிறுவனுக்கு நடத்தப்பட்ட ரத்தப் பரிசோதனையில் அவருக்குச் செலுத்தப்பட்ட ரத்தத்தில் ‘ஹெச்ஐவி’ தொற்று இருப்பது தெரிய வந்தது. இதனால் பெற்றோர் கடும் அதிர்ச்சி அடைந்தனர்.
மாநிலம் முழுவதும் பேசுபொருளாக மாறியுள்ள இவ்விவகாரம் குறித்து விசாரணை நடத்த ஐந்து பேர் கொண்ட மருத்துவக்குழுவை ஜார்க்கண்ட் அரசு அமைத்துள்ளதாக பிடிஐ செய்தி தெரிவிக்கிறது.
முதற்கட்ட விசாரணையின்போது, தலசீமியா நோயாளி ஒருவருக்கு ரத்தம் மாற்றப்பட்டது தெரியவந்தது.
மேலும், குற்றச்சாட்டுகளுக்கு ஆளாகியுள்ள அக்குறிப்பிடப்பட்ட ரத்த வங்கியில் சில முரண்பாடுகள் கண்டறியப்பட்டதாகவும் அவற்றைச் சரிசெய்ய அதிகாரிகளுக்கு உத்தரவிடப்பட்டுள்ளதாகவும் தகவல்கள் தெரிவிக்கின்றன. ரத்தத்தில் எவ்வாறு ஹெச்ஐவி தொற்று ஏற்பட்டது என்பது குறித்தும் விசாரணை நடந்து வருகிறது.
சதார் மருத்துவமனையின் ரத்த வங்கியிலும் குழந்தைகள் தீவிர சிகிச்சைப் பிரிவிலும் ஆய்வு மேற்கொண்ட மருத்துவக் குழுவினர், அங்கு சிகிச்சை பெற்று வரும் குழந்தைகளிடம் இருந்து விவரங்களைச் சேகரித்துள்ளனர்.
ரத்தம் செலுத்தப்பட்ட சிறுவனுக்கு ஹெச்ஐவி தொற்று இருப்பது ஒரு வாரத்துக்கும் முன்பே உறுதியாகிவிட்டது என்று மாவட்ட சிவில் அறுவை சிகிச்சை நிபுணர் மருத்துவர் சுஷாந்தோ மஜ்ஹீ தெரிவித்தார்.
தொடர்புடைய செய்திகள்
ஹெச்ஐவி தொற்று ஏற்பட, மாசுபட்ட ஊசிகளைப் பயன்படுத்துவது உள்ளிட்ட வேறு சில காரணங்களும் உள்ளதாக அவர் மேலும் கூறினார்.
மேற்கு சிங்பூம் மாவட்டத்தில் 515 ஹெச்ஐவி நோயாளிகளும் 56 தலசீமியா நோயாளிகளும் உள்ளனர்.