மாணவர் முரசு
இ-பேப்பர்
மும்பை: இந்தியாவின் வணிகத் தலைநகரான மும்பை மாநகரின் பவய் பகுதியில் வியாழக்கிழமை (அக்டோபர் 30) 17 குழந்தைகளைப் பிணைபிடித்த ஆடவரைக் காவல்துறையினர் சுட்டுக்கொன்றனர்.
ரோகித் ஆர்யா என்ற அந்த ஆடவர் துப்பாக்கியால் தங்களை நோக்கிச் சுட்டதால் தற்காப்பிற்காகத் திருப்பிச் சுட்டதில் அவர் இறந்துபோனதாகக் காவல்துறை தெரிவித்தது.
நெஞ்சில் குண்டுபாய்ந்த நிலையில் மருத்துவமனைக்குக் கொண்டுசெல்லப்பட்ட அவர், சிகிச்சை பலனின்றி உயிரிழந்தார்.
நேர்முகத் தேர்வு எனக் கூறி ‘ஆர்ஏ ஸ்டுடியோ’ எனும் சிறிய ஒளிப்பட நிலையத்திற்கு அக்குழந்தைகளை வரவழைத்தார் ஆர்யா. எட்டு முதல் 14 வயதிற்குட்பட்ட அக்குழந்தைகளை அவர் இரண்டு மணி நேரமாகச் சிறைபிடித்து வைத்திருந்தார்.
அதுபற்றி பிற்பகல் 1.45 மணியளவில் தகவல் கிடைக்க, காவல்துறை அவ்விடத்திற்கு விரைந்துசென்றது. பேச்சுவார்த்தை நடத்தியும் குழந்தைகளை விடுவிக்க ஆர்யா மறுத்துவிட்டார்.
அதனால், குளியலறை வழியாக அந்த ஒளிப்பட நிலையத்திற்குள் புகுந்த காவல்துறைக் குழு, அந்த 17 குழந்தைகளையும் பத்திரமாக மீட்டது.
சம்பவத்திற்குமுன் காணொளி ஒன்றை வெளியிட்டிருந்தார் ஆர்யா.
அதில், “நான் ரோகித் ஆர்யா. என்னுயிரை மாய்த்துக்கொள்ளுமுன், சில குழந்தைகளைப் பிணைபிடிக்கத் திட்டமிட்டுள்ளேன். என்னுடையதெல்லாம் அறநெறிப்பட்ட சிறு கோரிக்கைகளும் சில கேள்விகளும்தான்,” என்று அவர் கூறியிருந்தார்.
தொடர்புடைய செய்திகள்
அத்துடன், ஏதேனும் தவறாக நடக்க முயன்றால் அவ்விடத்திற்குத் தீ வைத்துவிடுவேன் என எச்சரித்த ஆர்யா, தான் பணம் கேட்கவில்லை என்றும் தான் ஒரு பயங்கரவாதி இல்லை என்றும் குறிப்பிட்டிருந்தார்.
மகாராஷ்டிர மாநில முதல்வரின் ‘என் பள்ளி, அழகான பள்ளி’ எனும் திட்டத்தின்கீழ் கல்வித்துறை தனக்குத் தரவேண்டிய பணத்தைத் தரவில்லை என்று ஆர்யா முன்னதாகக் குற்றஞ்சாட்டியிருந்தார்.
தனது வேலைக்காகத் தனக்கு ரூ.2 கோடியைக் கல்வித்துறை ஒதுக்கியபோதும் கடந்த 2024 ஜனவரியிலிருந்து பணம் தரப்படவில்லை என்றும் அவர் சாடியிருந்தார்.
அப்போதைய கல்வி அமைச்சர் தீபக் கேசர்க்கர் தனிப்பட்ட வகையில் உறுதியளித்திருந்தபோதும் அதிகாரிகள் தன்னை ஓரங்கட்டுவதாகக் கூறி, சென்ற ஆண்டில் ஆர்யா இருமுறை பட்டினிப் போராட்டத்தில் இறங்கினார்.
இந்நிலையில், ஆர்யாவிற்கு ரூ.2 கோடி வழங்குவதாக எந்த உடன்பாடும் செய்யப்படவில்லை என்று மாநிலக் கல்வித்துறைச் செயலாளர் ரஞ்சித் சிங் தியோல் விளக்கமளித்துள்ளார்.