மாணவர் முரசு
இ-பேப்பர்
பெங்களூரு: கர்நாடக இணையக் குற்றத் தடுப்பு அதிகாரிகளின் அதிரடி நடவடிக்கையால், ‘டிஜிட்டல் அரஸ்ட்’ மோசடியில் ரூ.17 லட்சத்தை இழந்த மங்களூரைச் சேர்ந்த 79 வயது மூதாட்டியின் பணம் மீட்கப்பட்டுள்ளது.
இந்தியாவின் முக்கிய நகரங்களில் இதுபோன்ற இணையக் குற்றங்கள் அதிகரித்து வருகின்றன.
அரசாங்க மதிப்பீட்டின்படி, கடந்த 2024ஆம் ஆண்டில் மட்டும் சுமார் 120,000 இணைய மோசடிச் சம்பவங்களால் இந்தியர்கள் கிட்டத்தட்ட ரூ.19 பில்லியனை இழந்துள்ளனர். ‘டிஜிட்டல் கைது’ மோசடிகளை அரங்கேற்ற முதியவர்கள்தான் அதிகம் குறி வைக்கப்படுவதாக அதிகாரிகள் தெரிவித்தனர்.
கடந்த அக்டோபர் 23 ஆம் தேதி மங்களூரு பெஜாய் பகுதியைச் சேர்ந்த அந்த மூதாட்டிக்கு ஒரு வாட்ஸ்அப் அழைப்பு வந்துள்ளது. காவல்துறை அதிகாரிபோல நடித்த அந்த மோசடிப் பேர்வழி, மூதாட்டி மீது வழக்குப்பதிவு செய்யப்பட்டுள்ளது என்றும் அதில் இருந்து விடுவிக்க வேண்டுமெனில் பணம் தர வேண்டும் என்றும் கேட்டுள்ளார்.
சுமார் 5 மணி நேரமாக ‘டிஜிட்டல் கைது’ செய்யப்பட்டிருந்த அந்த மூதாட்டி, பிற்பகலில் தனது வங்கிச் சேமிப்புக் கணக்கிலிருந்து ரூ. 17 லட்சத்தை மோசடிப் பேர்வழியின் வங்கிக் கணக்கிற்கு மாற்றி விட்டார்.
பின்னர், அந்த மூதாட்டி, இந்தச் சம்பவம் குறித்து பக்கத்துக்கு வீட்டுக்காரரிடம் தெரிவிக்க, அவர் உடனடியாக 1930 என்ற அவசர எண்ணுக்கு அழைத்துப் புகார் தெரிவித்துள்ளார்.
அதிகாரிகளும் விவரங்களைப் பெற்று அதிரடி நடவடிக்கை எடுத்து, வங்கி அதிகாரிகளைத் தொடர்புகொண்டு பணப்பரிமாற்றத்தை நிறுத்தியதோடு மோசடிப் பேர்வழிகளின் வங்கிக் கணக்கையும் முடக்கினர்.
பின்னர், நீதிமன்ற உத்தரவின்படி பணம், பாதிக்கப்பட்ட மூதாட்டியின் வங்கிக் கணக்கிற்கு மாற்றப்பட்டது.
தொடர்புடைய செய்திகள்
இதுபோன்ற பெரும்பாலான வழக்குகளில் பாதிக்கப்பட்டவர்கள் காவல்துறையிடம் புகார் அளிக்க அஞ்சுகின்றனர். எனவேதான், இழந்த பணத்தை மீட்பது சிரமமாகி விடுகிறது என்றார் இணையக் குற்றத் தடுப்புத் துறை உயர் அதிகாரி மிதுன்.
பாதிக்கப்பட்டவர்கள் தாமதமாகப் புகார் செய்வதால், இழந்த பணத்தை மீட்க முடிவதில்லை. தாம் ஏமாற்றப்பட்டு விட்டோம் என்று உணர்ந்தவுடன் விரைவாகப் புகார் அளித்தால், பணத்தை மீட்க அதிக வாய்ப்புள்ளதாக அந்த அதிகாரி தெரிவித்தார்.
2022 ஆம் ஆண்டுக்கும் 2024 ஆம் ஆண்டுக்கும் இடைப்பட்ட காலத்தில் ‘டிஜிட்டல் கைது’ மோசடிகளின் எண்ணிக்கை கிட்டத்தட்ட மூன்று மடங்காக அதிகரித்துள்ளதாகக் கூறப்படுகிறது.
இந்த மோசடிகளில் கணிசமான பகுதியானது தென்கிழக்கு ஆசியாவில் இருந்து வருகிறது, அது இணையக் குற்ற மையமாக அறியப்படுகிறது. அதிகமான இந்திய குடிமக்கள் இந்த நடவடிக்கைகளில் சிக்கி பணத்தை இழந்து வருவது தொடர்ந்து நடந்து வருகிறது.