மாணவர் முரசு
இ-பேப்பர்
ஹைதராபாத்: சவூதி அரேபியாவில் பேருந்து, கொள்கலன் லாரி மோதிய விபத்தில் உயிரிழந்த இந்தியர்களின் குடும்பத்தாருக்கு ரூ.5 லட்சம் கருணைத்தொகை வழங்கப்படும் என தெலுங்கானா அரசு அறிவித்துள்ளது.
மேலும், மாநில அரசு சார்பாக சவூதி அரேபியாவுக்கு நிவாரணக் குழு அனுப்பி வைக்கப்படும் என்றும் தெரிவிக்கப்பட்டது.
இந்தியாவின் ஹைதராபாத்தைச் சேர்ந்த உம்ரா புனிதப் பயணிகளை ஏற்றிச் சென்ற பேருந்து ஒன்று சவூதிவில் உள்ள மதீனாவில் கொள்கலன் லாரியுடன் மோதி விபத்துக்குள்ளானதில் இறந்தவர்களின் எண்ணிக்கை 45ஆக அதிகரித்துள்ளது.
பாதிக்கப்பட்டவரின் உறவினருக்கு தெலுங்கானா சிறுபான்மை நலத்துறை அமைச்சர் முகம்மது அசாருதீன் ஆறுதல் கூறினார்.
இந்நிலையில், ரஷீத் என்பவர் தனது குடும்பத்தைச் சேர்ந்த 18 பேரை இந்த விபத்தில் பறிகொடுத்துவிட்டதாக கண்ணீர் மல்க தெரிவித்துள்ளார். 35 வயதான ரஷீத்துக்கு ஏற்பட்ட இந்த இழப்பு பலரையும் அதிர்ச்சி அடைய வைத்துள்ளது.
ரஷீத்தின் பெற்றோர், 32 வயது சகோதரர், 35 வயது மைத்துனி, அவர்களது மூன்று குழந்தைகளும் பலியானவர்களில் அடங்குவர்.
இதனிடையே, சவூதி விபத்தில் பாதிக்கப்பட்ட ஒவ்வொரு குடும்பத்திலிருந்தும் இருவர் இந்தியாவிலிருந்து அங்கு அழைத்துச் செல்லப்பட உள்ளதாக திங்கட்கிழமை (நவம்பர் 17) தெலுங்கானா அரசு அறிவித்தது.
மேலும், நிவாரணப் பணிகளை ஒருங்கிணைக்க மாநில அரசு சார்பாக ஒரு குழு சவூதிக்கு அனுப்பப்படும் என்றும் அரசு வட்டாரங்கள் தெரிவித்தன.
தொடர்புடைய செய்திகள்
அந்தக் குழுவிற்கு அமைச்சர் முகம்மது அசாருதீன் தலைமை தாங்குவார் என்றும் அசாதுதீன் ஓவைசியின் கட்சி சார்பாக ஒரு எம்எல்ஏவும் சிறுபான்மையினர் நலத்துறை அதிகாரியும் குழுவில் இடம்பெறுவார்கள் என்றும் பிடிஐ செய்தி தெரிவிக்கிறது.