மாட்சாவின் மகிமை

புதிய அனுபவங்களை முயற்சி செய்து பார்க்கும் வகையில் இரண்டாண்டுகளுக்கு முன்பு ‘மாட்சா’ (Matcha) எனும் ஜப்பானிய தேநீர் வகையை அருந்தத் தொடங்கினார் ஜேனட் ஷாலினி, 27.

காப்பி பானங்களில் உள்ள அதிக அளவிலான ‘காஃபின்’ எடுத்துக்கொள்ள முடியாத அவருக்கு மாட்சா தேநீர் பானம் ஒரு சிறந்த மாற்றாக இருந்தது.

“மாட்சா தேநீர் பானத்தின் குளிர்ச்சியான பச்சை நிறமும் அதன் சுவையும் என்னை மிகவும் கவர்ந்தன,” என்றார் அவர்.

அதுமட்டுமின்றி மாட்சாவில் பலவித சத்துகளும் அடங்கியுள்ளதால் அதை விரும்பி அருந்துவதாகவும் ஜேனட் தெரிவித்தார்.

ஜப்பானிய ‘சூப்பர்ஃபுட்’ என்று கருதப்படும் மாட்சா அண்மையில் ஜேனட் போன்ற சிங்கப்பூர் இளையர்களை வெகுவாக ஈர்த்துள்ளது. சமூக வலைத்தளங்களில் மாட்சா பானங்கள் பரவலாக வலம் வருகின்றன.

அதுமட்டுமின்றி சிங்கப்பூரில் தற்போது பல சிற்றுண்டியகங்களில் மாட்சா பானங்கள் பல சுவைகளில் கிடைக்கின்றன. மாம்பழ மாட்சா, இளநீர் மாட்சா என புத்தாக்கம் ததும்ப இப்பானம் பல சிங்கப்பூரர்களின் மனத்தைக் கவர்ந்துள்ளது.

மாட்சா தேநீரின் கவர்ச்சிகரமான தன்மையுடன் அதற்கு நற்குணங்கள் பல உண்டு என்றால் அது மிகையாகாது. 

உடலுக்கும் மனதுக்கும் அமைதி

மாட்சாவிலும் ‘காஃபின்’ உள்ளது. ஆனால் அதனுடன் எல்-தியானைன் (L-theanine) அமினோ அமிலம் கலந்துள்ளதால் காப்பி போல் அல்லாமல் மாட்சா உடலுக்குத் தேவையான சுறுசுறுப்பை மெதுவாக வெளியிடுகிறது.

தொடர்புடைய செய்திகள்

மனஅழுத்தத்தைக் குறைக்கும் உணவு வகைகள்

பகல் தூக்கத்தைத் துரத்தியடிக்கும் வழிகள்

காப்பியில் உள்ள ‘காஃபின்’ சில நேரங்களில் உடல் நடுக்கத்தை அளிப்பதால் பலர் மாட்சா பானத்தின் பக்கம் திரும்புவதுண்டு.

அதுமட்டுமின்றி குறுகிய நேரத்துக்கு மட்டும் உடலுக்கு விழிப்புணர்வு தரும் காப்பியைப் போல அல்லாமல் மாட்சா தரும் சுறுசுறுப்பு நாள் முழுவதும் நீடிக்கும் என்றும் நிபுணர்கள் கூறியுள்ளனர்.

மெதுவான, நிலையான ‘காஃபின்’ வெளியீடு காரணமாக பெரும்பாலும் மாட்சா அருந்துபவர்கள் அமைதி பெறுவார்கள்.

எடை குறைக்க உதவும்

உடற்பயிற்சி மேற்கொள்வதற்கு முன்பு மாட்சா உட்கொள்வதால் உடலில் உள்ள கொழுப்பை எளிதில் இழக்கலாம் என்று ஆய்வுகள் கண்டறிந்துள்ளன.

வளர்சிதை மாற்றத்தை அதிகரிக்கவும் கொழுப்பைக் குறைக்கவும் மாட்சா உதவுகிறது. இவை இரண்டும் எடைக் குறைப்புக்கு உதவும் என்று கருதப்படுகின்றன.

மூளைச் செயல்பாட்டை அதிகரிக்கிறது

கவனம், நினைவாற்றல், எதிர்வினை நேரம் ஆகியவற்றை மேம்படுத்தும் ஆற்றல் கொண்டுள்ளது மாட்சா.

காப்பியைவிட மாட்சாவில் அதிக ‘காஃபின்’ இருப்பதால் மூளையின் மேம்பட்ட செயல்பாட்டுக்கு அது ஒரு காரணமாக இருக்கலாம் என்று ஆய்வாளர்கள் நம்புகின்றனர்.

ஆரோக்கிய நன்மை தரும் என்றாலும், மாட்சாவை மிதமாக உட்கொள்வது நல்லது என்கின்றனர் நிபுணர்கள். சான்றளிக்கப்பட்ட, கலவை இல்லாத மாட்சா வகையை வாங்கிப் பருகுவதும் ஆரோக்கியத்தைப் பாதிக்கும் அபாயத்தைக் குறைக்கும்.