வசதி குறைந்தோருக்கு நிதி திரட்டும் நடை

நடை மூலம் நிதி திரட்டும் பெரும் முயற்சிமூலம் வசதிகுறைந்த தென்கிழக்கு வட்டாரவாசிகள் 1,000 பேர் வரைப் பயன்பெறவுள்ளனர்.

ஆகஸ்ட் 30 முதல் அக்டோபர் 31 வரை மக்கள், நடக்கும் ஒவ்வொரு கிலோமீட்டருக்கும் $1 பேரங்காடிப் பற்றுச்சீட்டை ஃபேர்பிரைஸ் அறக்கட்டளை நன்கொடையாக வழங்கும். ஆர்வமுள்ளவர்கள் go.gov.sg/wfh2025 இணையத்தளத்தில் தாங்கள் நடந்துள்ள தூரத்தைப் பதிவுசெய்யலாம்.

இதன்மூலம், $100 மதிப்பிலான ஃபேர்பிரைஸ் பற்றுச்சீட்டுகளைப் பயனாளர்கள் பெறவுள்ளனர்.

ஆகஸ்ட் 30ஆம் தேதி இவ்வாண்டின் நடைத் துவக்கம் கண்டது. - படம்: தென்கிழக்கு சிடிசி

அரிசிக்குப் பதிலாகப் பற்றுச்சீட்டுகள்

2009 முதல் 16 ஆண்டுகளாக ஃபேர்பிரைஸ் குழுமமும் தென்கிழக்குச் சமூக மேம்பாட்டு மன்றமும் (சிடிசி) இந்நடையை ஏற்பாடு செய்துவந்துள்ளன.

இதற்கு முந்தைய ஆண்டுகளில் அரிசி நன்கொடையாக வழங்கப்பட்டது. மக்கள் நடக்கும் ஒவ்வொரு 300 மீட்டருக்கும் ஒரு கிண்ணம் கைக்குத்தல் அரிசி, ஒரு கிண்ணம் வெள்ளை அரிசி, ஒரு கிண்ணம் ஓட்மீல் வழங்கப்பட்டன.

சென்ற ஆண்டின் நடையில் வசதிகுறைந்த 7,000 பேருக்கு $100,000 மதிப்பிலான வெள்ளை அரிசி, கைக்குத்தல் அரிசி, ஓட்ஸ் கிண்ணங்கள் வழங்குவது இலக்காக இருந்தது.

“இவ்வாண்டு அரிசிக்குப் பதிலாகப் பற்றுச்சீட்டுகளை வழங்குவதால் குடியிருப்பாளர்கள் தங்கள் சொந்த தேவைகளுக்கேற்ப பொருள்களை வாங்கலாம்,” என்று தென்கிழக்கு வட்டார மேயரும் கலாசார, சமூக, இளையர் மற்றும் மனிதவளத் துணையமைச்சருமான தினே‌ஷ் வாசு தாஸ் கூறினார்.

“பற்றுச்சீட்டுகளை வழங்கும் இப்புதிய முயற்சியை நாம் சோதித்துப் பார்க்கிறோம்; சிரமங்கள் எதிர்கொண்டால் மீண்டும் பரிசீலிப்போம். சிடிசி பற்றுச்சீட்டுகளைப் போலவே சிகரெட்டுகள், மதுபானங்களுக்கு இப்பற்றுச்சீட்டுகளைப் பயன்படுத்த முடியாது,” என்றார் அவர்.

தொடர்புடைய செய்திகள்

தொடங்கியது ‘பிசிஎஃப்’ நன்கொடை வாரம்

இவ்வாண்டின் மாற்றங்களுக்கேற்ப சென்ற ஆண்டுவரை ‘ஃபேர்பிரைஸ் வாக் ஃபார் ரைஸ்+@சவுத் ஈஸ்ட்’ என அழைக்கப்பட்டுவந்த நடை இவ்வாண்டு ‘ஃபேர்பிரைஸ் குழுமம் வாக் ஃபார் ஹெல்த்@சவுத் ஈஸ்ட்’ எனப் பெயர் மாற்றம் கண்டுள்ளது.

முதன்முறைப் பயனாளர்களான ஏஞ்சலினா கோ, 76, செலெஹா அலி, 76, அரிசியைவிட பற்றுச்சீட்டுகளையே விரும்புவதாகக் கூறினர்.

“பற்றுச்சீட்டுகளைக் கொண்டு ரொட்டி, பால், காய்கறிகளை வாங்கலாம். எதிர்காலத் தேவைக்கும் சேர்த்துவைக்கலாம். தனியாக வாழ்வோரால் அரிசி காலாவதியாவதற்குள் முடிக்க முடியுமா எனத் தெரியாது. சிலர் வேறு அரிசி வகைகளுக்கும் பழகியிருக்கக்கூடும்,” என்றார் செலெஹா.

பயனாளர்களின் எண்ணிக்கை இவ்வாண்டு குறைந்தாலும், தென்கிழக்கு சிடிசி, மற்ற பங்காளிகளுடன் இணைந்து உதவி தேவைப்படுவோரைச் சென்றடைகிறது.

‘ஹெச்பி இங்க்’ நிறுவனத்தின் சமூகத் தாக்கச் செயற்குழுவின் இணைத் தலைவர் அரவிந்த் சுந்தரராமன், 42, அடுத்த இரு மாதங்களில் தம் நிறுவனத்தினரை ஈடுபடுத்தி குழு நடைகளை ஏற்பாடு செய்யவுள்ளதாகக் கூறினார்.