சீனப் புத்தாண்டின் முதல் நாளன்று (பிப்ரவரி 10), வயதானோருக்கும் வசதிகுறைந்த குடும்பங்களுக்கும் உணவும் சிவப்பு உறைகளையும் வழங்கினர் ‘ஏபெக்ஸ் கிளப்ஸ் சிங்கப்பூர்’ அறநிறுவனத்தின் 20க்கும் மேற்பட்ட தொண்டூழியர்கள்.
காலை 8 முதல் 10 மணி வரை, தோ பாயோ லோரோங் 1, புளோக் 170ல் ஓரறை வீடுகளில் வசிக்கும் மொத்தம் 60 வசதிகுறைந்தோர் இதனால் பயனடைந்தனர்.
இம்முயற்சியை ‘ஏபெக்ஸ் கிளப்ஸ் சிங்கப்பூர்’ பத்து ஆண்டுகளுக்கும் மேலாக செயல்படுத்தி வருகிறது.
தொண்டூழியர்கள், அரிசி, நூடல்ஸ், முட்டைகள், பிஸ்கெட்டுகள், ஓட்ஸ், மைலோ, புட்டி உணவுகள், ‘குவே’ போன்ற விழாக்கால உணவு வகைகளையும் சூடான காப்பி, இரு ஆரஞ்சுப் பழங்கள், பணத்துடன் கூடிய சிவப்பு உறைகள், ‘பிருந்தாஸ்’ உணவக உணவு ஆகியவற்றையும் அடுக்குமாடிக் கட்டடத்தின் கீழ்த்தளத்தில் விநியோகித்தனர்.
கீழே வர இயலாத வயதானோர், ஊனமுற்றோருக்கு வீட்டிற்கே சென்று அவற்றை வழங்கினர் தொண்டூழியர்கள்.
இதற்கு முன்பு, வீடு வீடாகச் சென்று குடியிருப்பாளர்களின் தேவைகளைப் புரிந்துகொள்ளும் முயற்சியும் இடம்பெற்றது.
“உணவைப் பகிர்ந்துகொள்வதும் உதவி தேவைப்படுவோருக்கு உதவுவதும் சீனப் பாரம்பரியத்தில் வேரூன்றிய கூறுகள்.
“பண்டிகைக் காலங்களில் அனைவரிடமும் விழாக்கால உணர்வு சென்றடைவது முக்கியம்,” என்றார் ‘ஏபெக்ஸ் கிளப்ஸ் சிங்கப்பூர்’ அறநிறுவனத்தின் மூத்த உறுப்பினரும் இத்திட்டத்தின் தலைவருமான ஹாஜா ஜஃபருல்லாஹ்.
தன் பிள்ளைகளையும் அழைத்துவந்த நெடுநாள் தொண்டூழியர் தனம், “தொண்டூழியம் குடும்ப நிகழ்ச்சியாக இருக்க வேண்டும். எங்கள் முயற்சியைப் பாராட்டும் பயனாளிகளுடன் நேரம் செலவழிப்பதில் மகிழ்ச்சியடைகிறோம்,” என்றார்.
‘ஏபெக்ஸ் கிளப்ஸ் சிங்கப்பூர்’ அறநிறுவனத்தின்கீழ், பாசிர் ரிஸில் ‘ஏபெக்ஸ் ஹார்மனி லோட்ஜ்’ எனும் மறதிநோய் உடையோருக்கான தங்குவிடுதியும் புக்கிட் மேராவில் ‘ஏபெக்ஸ்’ முதியோர் பகல்நேரப் பராமரிப்பு நிலையமும் உள்ளன.
‘ஏபெக்ஸ் கிளப்ஸ் சிங்கப்பூர்’ அறநிறுவனம் குறித்த மேல்விவரங்களுக்கு https://apexrehab.org.sg/ மற்றும் https://www.apexharmony.org.sg/ இணையத்தளங்களை நாடலாம்.