எண்ணங்களை வெளிப்படுத்தும் வண்ணச் சுவரோவியங்கள்

சிங்கப்பூரின் வளமான பல்லின சமூகத்தின் தனித்துவத்தை அழகிய சுவரோவியத்தின் வழியே வெளிப்படுத்தியுள்ளார் இல்லத்தரசியான சுவேதா குசைன்.

மக்கள் கழகம் சார்பில் நடைபெற்ற ‘ நமது சிங்கே, பங்குகொள்ளுங்கள்’ (Our Chingay, Step In) எனும் இயக்கத்தின்கீழ் நடைபெற்ற ‘சிங்கே: யுனெஸ்[Ϟ]கோவுக்கான பாதையின் சுவரோவிய வடிவமைப்பு’ போட்டிக்காக அவர் வடிவமைத்த ஓவியம் இறுதிச்சுற்றுக்குத் தகுதிபெற்றது.

“நான் இல்லத்தரசி. என் எண்ணங்களை வண்ணங்களின் வழியே வெளிப்படுத்துவது என் பொழுதுபோக்கு. என் மனத்திற்கு நெருக்கமான சிங்கப்பூரின் கலாசாரத்தை வெளியுலகுக்குச் சொல்லும் நோக்கில் அமைந்த போட்டியில் பங்கெடுக்க முடிவெடுத்தேன்,” என்றார் சுவேதா.

எஸ்எம்ஆர்டி பெருவிரைவு ரயிலில் காட்சிப்படுத்தப்பட்டுள்ள தமது ஓவியத்தின் முன் சுவேதா. - படம்: த கவி

கலாசாரத் திருவிழா (Carnival of Culture) எனும் தலைப்பில் இந்த ஓவியத்தை வடிவமைத்த இவர், “நான் இந்தியாவிலிருந்து இங்கு வந்து 12 ஆண்டுகளுக்கும் மேலாகின்றன. பல்வேறு வேற்றுமைகளுக்கிடையில் இங்குள்ள ஒற்றுமை எனக்குப் பிடித்த அம்சம். அதனைக் கொண்டாடும் வகையில் அமைந்த சிங்கே ஒரு தனித்துவமான நிகழ்ச்சி. யுனெஸ்கோவின் தொட்டுணரமுடியாத பாரம்பரியத்தின் பட்டியலில் அது இணைந்தால் அது பாதுகாக்கப்படுவதுடன், சிங்கப்பூரின் தனித்துவமான கலாசாரத்தை உலகம் அறிய வாய்ப்பு கிடைக்கும்,” என்றார்.

உலக நாடுகளுடன் ஒப்பிடுகையில் சிங்கப்பூரில் பல நாட்டு மக்கள் சமூகத்துடன் ஒன்றிணைந்து வாழ்வதாகக் கூறிய அவர், தம்மை இணைத்துக்கொண்ட சமூக ஒற்றுமைக்குத் தாம் பங்காற்றும் வகையில் இந்த ஓவியம் அமைந்ததில் மகிழ்ச்சியென்றும் சொன்னார்.

சிங்கே: சுவரோவிய வடிவமைப்புப் போட்டி

சிறப்பு விருந்தினர் கலாசார, சமூக, இளையர்துறைத் தற்காலிக அமைச்சரும், கல்வித் துறையின் மூத்த துணையமைச்சருமான டேவிட் நியோ, மக்கள் கழகப் பேராளர்கள், பங்கேற்பாளர்களுடன் இறுதிச்சுற்றுக்குத் தேர்வான ஓவியங்களை வரைந்த கலைஞர்கள். - படம்: த. கவி

கடந்த ஆண்டு ஜூலை மாதம் முதல் செப்டம்பர் மாதம்வரை 11 வாரங்கள் நடைபெற்ற போட்டியின் இறுதியில் 10 ஓவியங்கள் இறுதிச்சுற்றுக்குத் தேர்வாகின.

அவற்றை, அக்டோபர் 30 ஆம் தேதியன்று நடைபெற்ற நிகழ்ச்சியில் கலாசார, சமூக, இளையர்துறைத் தற்காலிக அமைச்சரும் கல்வித்துறை மூத்த துணையமைச்சருமான டேவிட் நியோ அறிவித்தார்.

2025 அக்டோபர் 30 முதல் 2026 ஜனவரி 18 வரை எஸ்எம்ஆர்டி ரயில்களில் இந்த ஓவியங்கள் இடம்பெறும். பொதுமக்கள் அவற்றில் சிறந்ததாகக் கருதப்படும் ஓவியங்களுக்கு வாக்களிக்கலாம்.

தொடர்புடைய செய்திகள்

10,000 பேரின் கைவண்ணத்தில் எஸ்ஜி60 சுவரோவியம்

அனைவரையும் உள்ளடக்கும் சிங்கப்பூரின் ஆகப் பெரிய கலை விழா

Show More

அத்துடன், இந்தச் சுவரோவியம் 2025 நவம்பர் 1 முதல் 2026 ஜனவரி 31 வரை ஹார்பர்ஃபிரன்ட் பெருவிரைவு ரயில் நிலையத்திலும். 2026 ஜனவரி 20 வரை ‘லியர் டவர்’ முன்பும், நவம்பர் 10 முதல் டிசம்பர் 5 வரை ரிபப்ளிக் பலதுறைத் தொழிற்கல்லூரியிலும் காட்சிக்கு வைக்கப்படும்.