மாணவர் முரசு
இ-பேப்பர்
வட்டச் சுற்று வழித்தடமோ
வந்த வரிசை நான்காகும்
தொட்டுச் செல்லும் நிலையங்கள்
தொன்மை மிக்க நகரங்கள்
எட்டுத் திசையை இணைப்பதைப்பார்
எழிலாய்க் காக்கும் காட்டடியில்
விட்டு விட்டு வெளியேறும்
விந்தை கொண்ட பாதையல்ல ! (1)
கிழக்கு மேற்கு தடத்தையிது
கிடைத்த இரண்டில் தொட்டுவிடும்
வழக்கு மாறி போகாமல்
வாஞ்சை கொண்டு மூன்றுமுறை
பழக்க மில்லாப் பயணியரும்
பாதை மாறிப் போகாதார்
உழைக்கும் வர்க்கப் பயனாளி
உடனே வீட்டை அடைவாரே ! (2)
மொத்த முள்ள அறுதடத்தில்
முனைய மில்லாத் தடவழியாம்
பத்தைத் தாண்டும் இணைப்புவழி
பாதை காணும் புதுமையென
மத்தைக் கொண்டு கடைவதைப்போல்
மாறி மாறி சுற்றிவரும்
அச்சம் வேண்டாம் பயணிக்க
ஆழம் அடியில் அறுபதுதான் ! (3)
வலதில் சுற்ற வெளிவட்டம்
வாயில் யாவும் வலப்புறந்தான்
உலகில் காணும் இவ்வடிவம்
உயர்ந்த தரத்தில் ஒன்றாகும்
இலகு வாகப் பயணிக்க
இடையில் வந்த வழித்தடமாம்
செலவில் பெரிதும் சேமிக்க
சீர்மை கொண்ட சிங்கப்பூர் ! (4)
இடதில் சுற்ற சிறுவட்டம்
இதிலும் அவர்கள் வலப்புறந்தான்
நடக்கும் தூர நிலையங்கள்
நான்கில் ஒன்றாம் கணக்குபடி
தடங்கள் ஒன்றாய்ச் சேர்ந்தாற்போல்
தரவு கொண்ட நெடும்பாதை
படங்கள் எடுத்துப் பயணிக்க
பற்றோ சீட்டோ தேவையில்லை ! (5)
எல்ல. கிருஷ்ணமூர்த்தி