மாணவர் முரசு
இ-பேப்பர்
ஏர்ஏஷியா நிறுவனம், வரும் ஜூலை 1 முதல் சிங்கப்பூருக்கும் ஜகார்த்தாவுக்கும் இடையிலான தனது இடைநில்லாச் சேவை ஒன்றை நிறுத்தவுள்ளது.
இந்த வழித்தடத்திலான தனது நேரடி விமானச் சேவையை நிறுத்தவுள்ளது.
ஸ்கூட், சிட்டிலிங்க் (Citilink) போன்ற குறைந்த கட்டணப் போட்டி நிறுவனங்கள் உட்பட மற்ற ஏழு விமான நிறுவனங்கள் தொடர்ந்து நேரடி விமானச் சேவை வழங்குகின்றன.
அதே வேளையில், இந்தோனீசியா ஏர்ஏஷியாவின் பயணிகள் ஜூலை முதல் கோலாலம்பூர் வழியாக மாற்றுப்பாதையில் திருப்பி விடப்படுவார்கள்.
சிங்கப்பூரிலிருந்து ஜகார்த்தாவிற்குத் தினமும் ஒரே ஒரு விமானத்தை மட்டும் இயக்கும் இந்தோனீசிய ஏர்ஏஷியா, இந்தக் குறைந்த கட்டண விமான நிறுவனத்தின் இந்தோனீசிய துணை நிறுவனமாக உள்ளது.
இதன் விளைவாக, பொதுவாக இரண்டு மணிநேரத்திற்கும் குறைவான ஒரு பயணம், கோலாலம்பூரில் காத்திருக்கும் நேரத்தைப் பொறுத்து 10 மணிநேரத்திற்கும் மேலாக நீட்டிக்கப்படலாம்.
சிங்கப்பூரில் இருந்து ஜகார்த்தாவிற்கு மற்ற விமான நிறுவனங்கள் தினமும் 31 நேரடி விமானச்சேவைகளை வழங்குவதால், மற்ற குறைந்த கட்டண நேரடி விருப்பங்கள் எளிதாக கிடைக்கும்போது ஏர்ஏஷியாவின் இந்த மாற்றுப் பயணத்தைப் பயணிகளில் சிலர் மட்டுமே ஏற்றுக்கொள்வார்கள் என்று ‘சோபி ஏவியேஷன்’ (Sobie Aviation) நிறுவனத்தின் விமானப் போக்குவரத்து ஆய்வாளர் பிரெண்டன் சோபி கூறினார்.
ஜூன் 22ல் நடந்த செய்தியாளர் கூட்டம் ஒன்றில் பேசிய ‘ஏர்ஏஷியாஎக்ஸ்’ (AirAsia X) குழுமத்தின் தலைமை நிர்வாகி போ லிங்கம், அந்நிறுவனம் தனது விமானங்களின் திறனை சிறப்பாகச் செயல்படும் வழித்தடங்களுக்கு மாற்றுவதன் மூலம் தனது கட்டமைப்பை மேம்படுத்துகிறது என்றார்.
அத்துடன், மத்திய கிழக்கு போர் காரணமாக அதிகரித்த விமான எரிபொருள் விலை, சில விமானச் சேவைகளைக் குறைக்கத் தூண்டியுள்ளதாகவும் அவர் குறிப்பிட்டார்.
தேவையை மிகவும் திறமையாக ஈர்க்கும் வகையில் கோலாலம்பூருடன் பிற மையங்கள் வழியாக அதன் ‘ஃப்ளை-த்ரூ’ (fly-through) சேவையை விமான நிறுவனம் பயன்படுத்தி வருவதாகவும் அவர் மேலும் கூறினார்.
