மாணவர் முரசு
இ-பேப்பர்
சிறையில் இருந்தாலும் தந்தையரின் அன்புக்கு அணைபோட இயலாது என்பதை நிரூபித்தது சிங்கப்பூர்ச் சிறைச் சேவையும் தந்தையர்க்கான நிலையமும் ஒருங்கிணைத்த தந்தையர் தினக் கொண்டாட்டம்.
வியாழக்கிழமை (ஜூன் 12) காலை நடைபெற்ற இந்நிகழ்ச்சி, குற்றச்செயல்களுக்காகச் சிறைத்தண்டனையை நிறைவேற்றிவரும் கைதிகள் தந்தையர் தினத்தைக் கொண்டாட வாய்ப்பளித்தது.
‘சிறையில் அடைக்கப்பட்ட தந்தையர்களுக்கான தந்தையர் தினக் காணொளி உறுதிமொழி’ என்பது நிகழ்ச்சியின் பெயர். தந்தையர் குடும்பத்தை விட்டு விலகி இருந்தாலும் அவர்களையும் அவர்களது பிள்ளைகளையும் அது ஒருங்கிணைத்தது.
தந்தைக்குக் கூற விரும்பும் வாழ்த்து, தந்தையிடம் அவர்களுக்குப் பிடித்த அம்சம் உட்பட பல்வேறு கருத்துகளைப் பிள்ளைகள் காணொளியாகப் பதிவு செய்து தத்தம் தந்தைக்கு அனுப்பியிருந்தனர்.
சிறைச்சாலையில், அக்காணொளியில் தங்கள் பிள்ளைகளைப் பார்த்த தந்தையரில் பலர் கண்ணீர் மல்கத் தங்கள் உணர்வுகளைப் பகிர்ந்துகொண்டனர்.
“உங்களை நேசிக்கிறோம்; உங்கள் வரவுக்காகக் குடும்பமே காத்திருக்கிறது; எப்போது எங்களை வெளியே அழைத்துச் செல்வீர்கள்?’’ என்பன உள்ளிட்ட தந்தையின் வரவுக்காகக் காத்திருக்கும் வாக்கியங்கள் நிறைந்த இதயபூர்வமான காணொளி அப்பர் சாங்கியில் உள்ள செலராங் பார்க் வளாகத்தின் எஸ்1 நிலையத்தில் திரையிடப்பட்டது.
இங்குள்ளவர்கள் முதல் அல்லது இரண்டாம் முறையாக, போதைப்பொருள் தொடர்பான குற்றச்செயல்களில் ஈடுபட்டவர்கள்.
தண்டனையை நிறைவேற்றினாலும், குடும்பத்தின் நாயகர்களாகத் தாங்கள் நேசிக்கப்படுவதை உணர்ந்து மகிழும் சிறப்புத் தருணத்தை அந்தக் கைதிகளுக்கு வழங்கியது இந்நிகழ்ச்சி.
தொடர்புடைய செய்திகள்
காணொளிப் பதிவில் 11 கைதிகளின் 25 பிள்ளைகள் பகிர்ந்த வாழ்த்துகள் திரையிடப்பட்டன. தங்கள் பிள்ளைகள் கைப்பட எழுதிய வாழ்த்து அட்டைகளையும் தந்தையர் பெற்றுக்கொண்டனர்.
இதுவரை பிள்ளைகளிடமிருந்து ஒலி வடிவில் வாழ்த்துகளைப் பெற்றுக்கொண்டிருந்த தந்தையர் இந்த ஆண்டு முதன்முறையாகக் காணொளி வடிவில் பிள்ளைகள் முகத்தையும் பார்க்க முடிந்தது என்று சிங்கப்பூர்ச் சிறைச் சேவைப் பேச்சாளர் தெரிவித்தார்.
குடும்பப் பிணைப்புகளை வலுப்படுத்துவதும், அதனை நிலைக்கச்செய்வதும், கைதிகளாகச் சமூக மூலதனத்தை அதிகரிப்பதும் இந்த நிகழ்ச்சியின் குறிக்கோள் என்று நிகழ்ச்சி ஒருங்கிணைப்பாளர்கள் தெரிவித்தனர்.