நாய்க்கடிச் சம்பவங்களைத் தொடர்ந்து நாய்கள் பிடிக்கப்பட்டன: பூங்காக் கழகம்

சிலேத்தார் வெஸ்ட்டில் உள்ள ஒரு பண்ணையில் 2025 மே மாதத்திலிருந்து நான்கு நாய்க்கடிச் சம்பவங்கள் நிகழ்ந்துள்ளதைத் தொடர்ந்து, அங்கிருந்து மூன்று நாய்களை அதிகாரிகள் அகற்றிவிட்டனர்.

அந்த நான்கு சம்பவங்களில் இரண்டு மட்டும் நவம்பரில் ஒரே வாரத்தில் நிகழ்ந்தவை.

நாய்களை வலுக்கட்டாயமாக அகற்றியது ஏற்புடையதா என்பது குறித்து கவலை எழுப்பப்பட்டதற்குப் பதிலளித்த தேசிய பூங்காக் கழகம், முன்னதாக நடந்த நாய்க்கடிச் சம்பவங்களையும் பொதுமக்களின் பாதுகாப்புக்கு ஆபத்து ஏற்பட்டதையும் கருத்தில்கொண்டு, நாய்களைப் பிடிப்பதற்கு ‘ஏற்கத்தக்க அளவு வலிமை’ பயன்படுத்தப்பட்டதாகக் கூறியது. இதற்குப் பயன்படுத்தப்பட்ட உபகரணங்கள் அனைத்துலக நடைமுறைகளை ஒத்திருந்ததாகவும் அது சொன்னது.

வெள்ளிக்கிழமை (நவம்பர் 14) இன்ஸ்டகிராமில் பதிவிடப்பட்ட காணொளிகள், இரண்டு கலப்பின நாய்கள் பண்ணையில் பிடிக்கப்படுவதையும் மூன்றாவது நாய் ஏற்கெனவே ஒரு கூண்டிற்குள் இருப்பதையும் காட்டுகின்றன. அவற்றைப் பிடிக்கும் நடவடிக்கையில் குறைந்தது ஐந்து ஆடவர்கள் ஈடுபடுவது தெரிகிறது.

விலங்குநலக் குழுக்கள் உள்ளிட்ட பிற சமூக ஊடகப் பக்கங்களிலும் இந்தக் காணொளிகள் பகிரப்பட்டதைத் தொடர்ந்து, நாய்கள் பலவந்தமாகப் பிடிக்கப்பட்ட விதம் குறித்து இணையவாசிகள் சிலர் கவலை தெரிவித்தனர்.

இதுபற்றி ஊடகங்களின் கேள்விகளுக்குப் பதிலளித்த தேசிய பூங்காக் கழக விலங்கு, கால்நடைச் சேவையின் சமூக விலங்கு மேலாண்மைப் பிரிவின் இயக்குநர் அன்னா வோங், சிலேத்தார் வெஸ்ட் ஃபார்ம்வே 8 பகுதியில் நான்கு நாய்க்கடிச் சம்பவங்கள் பதிவாகியுள்ளதாகத் தெரிவித்தார்.

நவம்பரில் மட்டும் ஆறு நாள்களுக்குள் நடந்த இரண்டு சம்பவங்களும் அவற்றில் அடங்கும் என்றும் பாதிக்கப்பட்டவர்களுக்குக் கீறல்கள் முதல் மருத்துவ உதவி தேவைப்படும் ஆழமான புண்கள் வரை காயங்கள் ஏற்பட்டன என்றும் அவர் கூறினார்.

எனவே, பொதுமக்களின் பாதுகாப்பை உறுதிசெய்ய விலங்கு, கால்நடைச் சேவை உடனடியாகச் செயல்பட வேண்டியிருந்தது. சுற்றித் திரியும் இந்த நாய்களைப் பிடித்து அவற்றை அகற்ற முடிவு செய்யப்பட்டது.