மாணவர் முரசு
இ-பேப்பர்
மூத்த ஊழியர்களின் வேலைவாய்ப்புகளை அதிகரிக்க மக்கள் செயல் கட்சி மூத்தோர் குழு திட்டமிடுகிறது. அதன் தொடர்பில், கொள்கைப் பரிந்துரைகள் அடங்கிய வெள்ளை அறிக்கையை அது முத்தரப்புப் பணிக்குழுவிடம் சமர்ப்பிக்கவிருக்கிறது.
குழு, கலந்துரையாடல் நிகழ்ச்சிக்கு ஞாயிற்றுக்கிழமை (அக்டோபர் 12) ஏற்பாடு செய்திருந்தது. அதில் ஓய்வுபெற்ற நாடாளுமன்ற உறுப்பினர்கள், பொதுமக்கள் என 300க்கும் மேற்பட்டோர் பங்கேற்றனர். மூத்தோர், முதலாளிகள், பங்காளித்துவ அமைப்பைச் சேர்ந்தோரிடமிருந்து கருத்துகளைத் திரட்டுவது நிகழ்ச்சியின் குறிக்கோள்.
திரட்டப்பட்ட கருத்துகளிலிருந்து பரிந்துரைகள், மூத்தோரின் வேலைவாய்ப்புகள் குறித்த முத்தரப்புப் பணிக்குழுவிடம் சமர்ப்பிக்கப்படும்.
பணிக்குழு, 2025ஆம் ஆண்டு நிறுவப்பட்டது. முதியவர்கள் வேலைகளில் சேர்வதற்குரிய தகுதியை மேம்படுத்திக்கொள்ள உதவும் நோக்கத்துடன் அது அமைக்கப்பட்டது. அத்துடன் அவர்களின் தேவைகளுக்கு ஏற்ற வேலைவாய்ப்புகளைக் கூட்டுவதும் இலக்கு.
கலந்துரையாடலில் பல்வேறு கருத்துகள் முன்வைக்கப்பட்டன. நீக்குப்போக்கான வேலைகளை உருவாக்குதல், நிறுவனங்கள் வேலைகளை நீண்டகால அடிப்படையில் நோக்குதல் முதலியவை அவற்றுள் சில. 70 வயதைக் கடந்த முதியோர் புதிய வாய்ப்புகளுக்கு ஏற்பத் தங்களைப் புதுப்பித்துக்கொள்ள வேண்டிய தேவைபற்றியும் நிகழ்ச்சியில் பேசப்பட்டது.
ஊழியர்கள் முன்கூட்டியே அதாவது 40, 50 வயதாகும்போதே அவர்களின் நெடுங்கால வேலை பற்றிய கலந்துரையாடல்களை ஆரம்பிப்பது முக்கியம் என்பதும் வலியுறுத்தப்பட்டது.
மக்கள் செயல் கட்சி மூத்தோர் குழு அண்மையில் நடத்திய இணையக் கருத்தாய்வின் முடிவுகளும் நிகழ்ச்சியில் பகிர்ந்துகொள்ளப்பட்டன. இந்த ஆண்டு செப்டம்பர் 26 முதல் இந்த மாதம் (அக்டோபர்) 2 வரை நடத்தப்பட்ட கருத்தாய்வில் ஏறக்குறைய 700 பேர் பங்கெடுத்தனர். மூத்தோர், 70 வயதுக்குப் பிறகும் வேலை செய்ய விரும்புகின்றனர் என்பதும் ஆனால் நிறுவனங்கள் அதனை ஏற்றுக்கொள்ள முடியாத நிலையில் இருக்கக்கூடும் என்பதும் அதில் தெரியவந்தன.
மூத்தோர் குழுவின் தலைவரும் மனிதவள அமைச்சருமான டாக்டர் டான் சீ லெங், இரண்டு தூண்களின் அடிப்படையில் குழு இயங்குவதாகச் சொன்னார். ஆதரவளிப்பது, செயல்படுவது ஆகியவையே அவை என்றார் அமைச்சர் டான்.
தொடர்புடைய செய்திகள்
குழுவின் துணைத் தலைவரும் தகவல் மின்னிலக்க மேம்பாட்டு, சுகாதாரத் துணையமைச்சருமான திருவாட்டி ரஹாயு மஹ்ஸாம், துணைத் தலைவரும் கலாசார, சமூக, இளையர், மனிதவளத் துணையமைச்சருமான திரு தினேஷ் வாசு தாஸ், கலந்துரையாடலை வழிநடத்திய நிர்வாகக் குழு உறுப்பினர் டாக்டர் தாங் லெங் லெங் முதலியோரும் நிகழ்ச்சியில் பங்கெடுத்தனர்.