மாணவர் முரசு
இ-பேப்பர்
மக்களின் அன்பைப் பெறவேண்டும் என்றால் அவர்களுக்கு அந்த நம்பிக்கையைக் கொடுக்க வேண்டும். நற்செயல்கள் மூலம் அத்தகைய உறுதியான எண்ணத்தை விதைப்பதே தமது தாரக மந்திரம் என்றார் வெஸ்ட் கோஸ்ட் - ஜூரோங் வெஸ்ட் குழுத்தொகுதி நாடாளுமன்ற உறுப்பினர் டாக்டர் ஹமீது ரசாக்.
ஞாயிற்றுக்கிழமை (நவம்பர் 9) காலை நடைபெற்ற மக்கள் செயல் கட்சியின் (மசெக) மாநாட்டில் பங்கேற்ற திரு ஹமீது, பொதுத் தேர்தல் 2025ல் வெற்றிபெற்று முதன்முறையாக நாடாளுமன்ற உறுப்பினர் பொறுப்பை ஏற்றுள்ளது நினைவுகூரத்தக்கது.
தொகுதி மக்களின் மனங்களை வெல்ல நாடாளுமன்ற உறுப்பினாராகச் செயலாற்றும் பாங்கு குறித்த தமிழ் முரசின் கேள்விகளுக்கு அவர் பதிலளித்தார்.
‘‘விலைவாசி உயர்வு போன்ற தேசிய அளவிலான பிரச்சினைகளைச் சந்தித்து வரும் சிங்கப்பூரர்கள் தங்கள் தொகுதி நாடாளுமன்ற உறுப்பினர்களைச் சந்திக்க வரும்போது அவர்களின் அன்றாடப் பிரச்சினைகளுக்கும் தீர்வு காண விழைகிறார்கள்.
“எல்லாப் பிரச்சினைகளையும் எளிதில் களைந்திட இயலாது என்றபோதும், மக்களின் நம்பிக்கையை வளர்ப்பது, மேம்படுத்துவது போன்றவற்றில் கவனம் செலுத்துவது முக்கியம்,’’ என்றார் அவர்.
கட்சியில் புதுப்பித்தல் நடவடிக்கை குறித்துக் கருத்துரைத்த அவர், ‘‘நபர்களை மாற்றுவது மட்டும் புதுப்பிப்பன்று. அணுகுமுறைகள், சிந்தனைகள் எனப் பலவும் புதுப்பித்தலில் அடங்கும். புதுப்பித்தல் என்பது தொடர்ச்சியாக நடைபெறக் கூடியது,’’ என்றார் திரு ஹமீது.
தொகுதி மக்கள் கூறவரும் கவலைகளை நேரம் கொடுத்துக் கேட்டு, பணிவான அணுகுமுறையுடன் கையாள்வது இன்றியமையாதது என்ற அவர், ‘‘நாடாளுமன்ற உறுப்பினராகச் செயலாற்ற உள்ள ஐந்தாண்டுக் காலத்தில் மேற்கூறியபடி நடந்து மக்களின் பிரச்சினைக்குத் தீர்வு காண அயராது முயல்வேன். அந்த இலக்கை நோக்கி உழைக்கவே வந்துள்ளேன்,’’ என்றார்.
மக்களின் நம்பிக்கையை எளிதாக எடுத்துக்கொள்ளக் கூடாது என்றும் பிரதமர் லாரன்ஸ் வோங் கூறியதைப்போல் உண்மையான ஆற்றல் மக்களின் வாக்குகளில்தான் உள்ளது என்றும், அண்மைய பொதுத் தேர்தல் அதை நினைவூட்டுவதாக அமைந்திருந்ததையும் திரு ஹமீது சுட்டினார்.
