லண்டன் ரயில் ஊழியர்களின் வேலைநிறுத்தப் போராட்டம்

லண்டன்: லண்டன் மாநகர நிலத்தடி ரயில் போக்குவரத்துத் துறை ஊழியர்களின் ஏழு நாள் வேலைநிறுத்தத்தால் பயணிகள் எதிர்நோக்கக்கூடிய சிரமம் குறித்துக் கவலை எழுந்துள்ளது.

உள்ளூர் நேரப்படி வெள்ளிக்கிழமை (செப்டம்பர் 5) மாலை 6 மணியளவில் (சிங்கப்பூரில் பின்னிரவு 1 மணி) லண்டனின் மேற்குப் பகுதியில் அமைந்துள்ள ருயிஸ்லிப்பில் வேலை நிறுத்தப் போராட்டம் தொடங்கும் என்றும் பணிமனை செயலாக்கக் கட்டுப்பாட்டு மேலாளர்கள் வேலை நிறுத்தத்தில் ஈடுபடுவர் என்றும் தெரிவிக்கப்பட்டது.

இருப்பினும், செப்டம்பர் 8ஆம் தேதி, ரயில்வே ஊழியர்கள் அனைவரும் ஒட்டுமொத்தமாக வெளிநடப்பு செய்யும்போது ஆக மோசமான சேவைத் தடை ஏற்படக்கூடும் என்று கருதப்படுகிறது.

சம்பளம், வேலைச்சூழல் ஆகியவற்றின் தொடர்பில் ரயில்வே ஊழியர்கள் போராட்டத்தில் ஈடுபடுகின்றனர். மேலும், சம்பளத்தை 3.4 விழுக்காடு உயர்த்த வேண்டும் என்றும் அவர்கள் கோருகின்றனர்.

ஆனால், அவர்கள் பரிந்துரைப்பதுபோல வாரத்துக்கு 35 மணி நேர வேலை எனும் திட்டம் நடைமுறைக்கு ஒவ்வாதது என்றும் அது கட்டுப்படியாகக் கூடியதன்று என்றும் லண்டன் போக்குவரத்துத் துறை முன்னர் கூறியிருந்தது.

இந்த வேலைநிறுத்தத்தால் லண்டன் பொருளியல் ஏறத்தாழ 230 மில்லியன் பவுண்டு (S$398.9 மில்லியன்) இழப்பைச் சந்திக்கும் என்று பொருளியல், வர்த்தக ஆய்வு நிலையம் மதிப்பிட்டுள்ளது.