மாணவர் முரசு
இ-பேப்பர்
அண்டைவீட்டார்க்கு இடையே ஏற்பட்ட சண்டையில், பெண்ணைக் கத்தியால் குத்திக் கொன்றதாக 66 வயது ஆடவர்மீது கொலைக் குற்றச்சாட்டு சுமத்தப்பட்டுள்ளது.
ஈசூன் சென்ட்ரல் புளோக் 323ல் வசித்துவரும் கோ ஆ ஹுவி என்ற அந்த ஆடவர், வியட்னாமைச் சேர்ந்தவரான நுயன் புவோங் டிரா, 30, என்பவரைக் கத்தியால் குத்திக் கொன்றதாகக் கூறப்படுகிறது.
இச்சம்பவம் புதன்கிழமை (செப்டம்பர் 24) அந்த புளோக்கின் ஆறாம் தளத்தில் காலை 7.25 மணியளவில் நிழந்தது. அதில் காயமுற்ற கோமீது வியாழக்கிழமை நீதிமன்றத்தில் குற்றஞ்சாட்டப்பட்டது.
சிங்கப்பூரரான கோ, திருவாட்டி டிராவின் நெஞ்சில் குத்தியதாக நீதிமன்ற ஆவணங்கள் கூறின. தாக்குதலைத் தடுத்து நிறுத்த முயன்றபோது, அப்பெண்ணின் 33 வயது கணவரும் தாக்கப்பட்டு, கடுமையான காயமுற்றார்.
சம்பவத்தைத் தொடர்ந்து அம்மூவரும் கூ டெக் புவாட் மருத்துவமனையில் சேர்க்கப்பட்டனர். ஆயினும், சிகிச்சை பலனின்றி திருவாட்டி டிரா உயிரிழந்தார்.
கோ அந்த புளோக்கின் ஐந்தாம் தளத்திலும் திருவாட்டி டிராவும் அவரின் கணவரும் தங்கள் இரு குழந்தைகளுடன் ஆறாம் தளத்திலும் வசித்து வந்ததாகக் குடியிருப்பாளர்கள் கூறினர்.
சத்தம் குறித்த புகார் தொடர்பில் அவ்விரு அண்டை வீட்டினரும் கருத்து வேறுபாட்டைத் தீர்க்க முயன்றுவந்த நிலையில், கத்திக்குத்து அரங்கேறியது.
அண்டைவீட்டார் இருவரும் தங்களுக்கு இடையிலான கருத்து வேறுபாட்டிற்குச் சமூக சமரச நிலையத்தின்மூலம் தீர்வுகாணத் தவறிவிட்டதாகக் கூறினார் நீ சூன் குழுத்தொகுதி நாடாளுமன்ற உறுப்பினர் ஜேக்சன் லாம். அவர்களுக்கு இடையிலான பிரச்சினை சமூக சர்ச்சை தீர்வுமன்றங்களுக்குக் கொண்டுசெல்லப்பட்டதாகவும் அவர் சொன்னார்.
தொடர்புடைய செய்திகள்
கோ மீதான வழக்கு அக்டோபர் 2ஆம் தேதிக்கு ஒத்திவைக்கப்பட்டது.
தீர்வுகாண தெரிவுகள் உண்டு
அண்டைவீட்டார் இடையிலான பிரச்சினைகளைத் தீர்த்துக்கொள்ள பல்வேறு தெரிவுகள் உள்ளன.
நீதிமன்றத்தில் எட்டப்பட்ட உடன்பாடுகளுக்கு இணங்கி நடப்பதை உறுதிசெய்யும் சட்ட ஆணையைப் பெறுவதும் அதில் ஒன்று.
குறைநிறைகளைக் கேட்டறிய தாம் வீடுகளுக்குச் செல்லும் ஒவ்வொரு முறையும் அண்டைவீட்டார் இடையிலான பிரச்சினைகள் தொடர்பில் சில புகார்கள் வருவது வழக்கம் என்று புக்கிட் பாஞ்சாங் தனித்தொகுதி நாடாளுமன்ற உறுப்பினர் லியாங் எங் ஹுவா கூறினார்.
அத்தகைய பிரச்சினைகளைத் தீர்த்துக்கொள்வதற்கான சில வழிமுறைகள் இருப்பதாகவும் அவர் குறிப்பிட்டார்.
கருத்து வேறுபாடு உடைய அண்டைவீட்டார் தங்கள் கவலைகளை முன்வைக்கவும் ஒருவர் இன்னொருவரின் கருத்துகளைச் செவிமடுக்கவும் ஏதுவாக ஒரு பொதுவான தொடர்புத் தளத்தை எம்.பி.க்கள் அல்லது தொண்டூழியர்கள் மூலம் ஏற்படுத்தித் தருவதிலிருந்து அது தொடங்குகிறது.
சில நேரங்களில் அது கைகொடுக்கலாம் என்றார் திரு லியாங்.
சத்தம், பொதுத் தாழ்வாரத்தில் பொருள்களைக் குவித்துவைப்பது போன்றவை தொடர்பிலேயே அதிகமான கருத்து வேறுபாடுகள் எழுவதாகவும் அவர் குறிப்பிட்டார்.
பிரச்சினையின் தொடக்கத்திலேயே அதுபற்றிக் கலந்துபேசுவதும் ஒருதரப்பினர் கூறுவதை இன்னொரு தரப்பினர் செவிமடுப்பதும் மோதலை நட்பாக மாற்றிவிடும் என்கிறார் இயோ சூ காங் தனித்தொகுதி நாடாளுமன்ற உறுப்பினர் யிப் ஹோன் வெங்.