படகுப் போட்டியில் பங்கேற்ற வீவக அணி வீரர் மரணம்

சிங்கப்பூரின் ரெகேட்டா நீர்விழாவின் தொடர்பில் நடைபெற்ற படகுப் போட்டியில் பங்கேற்ற 49 வயது ஆடவர் உயிரிழந்துவிட்டார்.

காலாங் சிங்கப்பூர் விளையாட்டு நடுவத்திலுள்ள நீர் விளையாட்டு மையத்தில் ஞாயிற்றுக்கிழமை (நவம்பர் 16) நடைபெற்ற கடல்நாகப் படகுப் போட்டியில் அவர் கலந்து கொண்டார்.

வீடமைப்பு வளர்ச்சிக் கழகத்தின் கடல்நாகப் படகு அணியைச் சேர்ந்த அந்த ஆடவரின் உடல்நிலை, காலைநேரப் பந்தயத்திற்குப் பின்னர் பாதிக்கப்பட்டதாகக் கூறப்பட்டது.

உடனடியாக அந்த இடத்திலேயே மருத்துவச் சிகிச்சை அளிக்கப்பட்டபோதும் அதற்குப் பலன் கிட்டவில்லை.

எனவே, நினைவிழந்த நிலையில் டான் டோக் செங் மருத்துவமனைக்கு அவர் கொண்டு செல்லப்பட்டார். அங்கு அவர் மாண்டதாக அறிவிக்கப்பட்டது.

அந்தச் சம்பவம் குறித்து பிற்பகல் 12.20 மணியளவில் காவல்துறைக்குத் தகவல் அளிக்கப்பட்டது.

ஆடவரின் மரணத்தில் சூது ஏதும் இல்லை என்று விசாரணையில் தெரிய வந்ததாகக் குறிப்பிட்ட காவல்துறை, விசாரணை நீடிப்பதாகக் கூறியது.

இதற்கிடையே, படகுப் பந்தயத்திற்குப் பிறகு ஓய்வெடுத்துக் கொண்டிருந்தபோது அவர் மயங்கி விழுந்ததாக வீடமைப்பு வளர்ச்சிக் கழகம் ஸ்ட்ரெய்ட்ஸ் டைம்ஸ் செய்தித்தாளிடம் கூறியது.

தொடர்புடைய செய்திகள்

படகு கவிழ்ந்து எண்மர் மரணம்

நவம்பர் 14 முதல் 16 வரை நடத்தப்பட்ட சிங்கப்பூர் ரெகேட்டா நீர் விழாவில் 25 பிரிவுகளின்கீழ் படகுப் போட்டிகள் நடத்தப்பட்டன. அவற்றில் கிட்டத்தட்ட 4,000 பேர் கலந்துகொண்டதாகத் தெரிவிக்கப்பட்டது.