மாணவர் முரசு
இ-பேப்பர்
வாழ்க்கையின் ஒவ்வொரு கட்டத்திலும் சிங்கப்பூரர்களை ஆதரிக்கும் ஒரு சமூகத்தைக் கட்டியெழுப்ப, இளையர்களை வளர்ப்பதற்கும், குடும்பங்களுக்கு அதிகமாகச் செய்வதற்கும், பாதிக்கப்படக்கூடியவர்களை ஆதரிப்பதற்கும், முதியோரைப் பராமரிப்பதற்கும் திட்டங்கள் உண்டு என்று அரசாங்கம் செப்டம்பர் 17ஆம் தேதி கூறியது.
சிங்கப்பூரர்களுக்கு நியாயமான, அனைவரையும் உள்ளடக்கிய சமூகத்தை உருவாக்குவதை நோக்கமாகக் கொண்ட பல முயற்சிகள் செயல்படுத்தப்படும். நாடு வேகமாக மூப்படைந்து வருவதால், சிறந்த வாழ்க்கையை நடத்துவதற்கான வாய்ப்புகளை அனைவரும் பெறுவதை இது உறுதி செய்யும்.
இதற்காக, சுகாதார அமைச்சு, சமுதாய, குடும்ப மேம்பாட்டு அமைச்சு, கல்வி அமைச்சு ஆகியவை செப்டம்பர் 17ஆம் தேதி, நாடாளுமன்றத்தின் தொடக்க விழாவில் அதிபர் தர்மன் சண்முகரத்னம் ஆற்றிய உரை தொடர்பான பிற்சேர்க்கையில் தங்கள் திட்டங்களைக் கோடிட்டுக் காட்டின.
சுகாதார அமைச்சு
சுகாதாரப் பராமரிப்பு உயர்தரமாகவும், அணுகக்கூடியதாகவும், கட்டுப்படியாகக்கூடிய விலையில் இருப்பதையும் உறுதி செய்வதற்காக, சுகாதார அமைச்சு அரசாங்க மருத்துவமனைகளிலிருந்து சமூகத்திற்கு, குறிப்பாக நோய்த்தடுப்பு பராமரிப்பு, மக்களின் ஆரோக்கியத்திற்காக, சிகிச்சை அணுகுமுறையை மாற்றுகிறது என்று சுகாதார அமைச்சர் ஓங் யி காங் கூறினார்.
மூப்படையும் மக்கள்தொகையின் அதிகரித்து வரும் தேவைகளைப் பூர்த்தி செய்ய, 2030ஆம் ஆண்டுக்குள் சுகாதார அமைச்சு 2,800 மருத்துவமனை படுக்கைகளைச் சேர்க்கும். புதிய ஈஸ்டர்ன் பொது மருத்துவமனை, மறுமேம்படுத்தப்பட்ட அலெக்சாண்ட்ரா மருத்துவமனை ஆகியவை இதில் அடங்கும்.
அதற்கு அப்பால், தெங்காவில் கட்டப்பட்டு வரும் மருத்துவமனை, சிங்கப்பூர் பொது மருத்துவமனை, தேசிய பல்கலைக்கழக மருத்துவமனை ஆகியவற்றின் வளாகங்கள் இரண்டும் மறுமேம்படுத்தப்படும்போது கூடுதல் படுக்கைகள் வரும். 2030ஆம் ஆண்டுக்குள் ஆறு புதிய பலதுறை மருந்தகங்கள், தாதிமை இல்லங்களில் 10,000 படுக்கைகள் ஆகியவையும் உருவாக்கப்படும் என்றும் அமைச்சு தெரிவித்தது.
சமுதாய, குடும்ப மேம்பாட்டு அமைச்சு
வாழ்க்கையின் ஒவ்வொரு கட்டத்திலும் குடும்பங்களை ஆதரிப்பதற்காக, அனைத்துக் குழந்தைகளுக்கும் மலிவுக் கட்டணத்தில், தரமான ஆரம்பகால குழந்தைப் பருவ சேவைகள் கிடைப்பதை சமுதாய, குடும்ப மேம்பாட்டு அமைச்சு உறுதி செய்யும்.
பராமரிப்பாளர்கள் தங்கள் அன்புக்குரியவர்களைப் பராமரிப்பதில் ஆதரவளிக்கும் அதே வேளையில், அவர்கள் பணியிடத்தில் தொடர்ந்து இருக்க அல்லது பணிக்குத் திரும்ப உதவுவதோடு, அணுகக்கூடிய, மலிவுக் கட்டணத்தில் குடும்ப ஆலோசனைச் சேவைகள் உருவாக்கப்படும் என்று சமுதாய, குடும்ப மேம்பாட்டு அமைச்சர் மசகோஸ் ஸுல்கிஃப்லி கூறினார்.
தொடர்புடைய செய்திகள்
கல்வி அமைச்சு
சிங்கப்பூரர்கள் வாழ்நாள் முழுவதும் கற்றலை ஏற்றுக்கொள்ளவும், செயற்கை நுண்ணறிவு (ஏஐ) முன்னேற்றங்களால் வடிவமைக்கப்பட்ட எதிர்காலத்தில் சிறந்து விளங்கவும் அவர்களைத் தயார்ப்படுத்தி, அதிகாரம் அளிக்கவும் கல்வி அமைச்சர் டெஸ்மண்ட் லீ விரும்புகிறார்.
மதிப்பெண்களுக்கு அதிக முக்கியத்துவம் கொடுப்பதை கல்வி அமைச்சு குறைத்துள்ளது. மேலும் மாணவர்கள் மதிப்பெண்களுக்கு அப்பால் கற்றலை ஏற்றுக்கொள்வதில் உதவ அமைச்சு விரும்புகிறது.
ஆரோக்கியமான பழக்கவழக்கங்களை ஊக்குவிக்கவும் மன நலனை ஆதரிக்கவும் ‘குரோ வெல் எஸ்ஜி’ (Grow Well SG) மூலம் பெற்றோர் மற்றும் அமைப்புகளுடன் இணைந்து பணியாற்றுவதன் மூலம் மாணவர்களின் சமூக உணர்வு மேம்பாடு மற்றும் நல்வாழ்வுக்கான ஆதரவை இது வலுப்படுத்தும் என்றும் தெரிவிக்கப்பட்டது.