மாணவர் முரசு
இ-பேப்பர்
ஈசூனின் மத்திய வட்டாரத்தில் நூற்றுக்கணக்கான புதிய வீடுகள் கட்டப்படவிருக்கின்றன. முன்னாள் ஈசூன் தற்காலிகப் பேருந்து முனையம் இருந்த இடமும் அதில் அடங்கும். அதற்காக அந்த முனையம் 2027ஆம் ஆண்டு ஏப்ரலுக்குள் இடிக்கப்படும்.
நகர மறுசீரமைப்பு ஆணையத்தின் (யுஆர்ஏ) வரைவுப் பெருந்திட்டம் 2025ன்படி, ஈசூன் வட்டாரத்தில் குடியிருப்புக்காக மூன்று தளங்களும் சுகாதார, மருத்துவப் பராமரிப்பு நிலையங்களுக்காக இரண்டு தளங்களும் ஒதுக்கப்பட்டுள்ளன.
வட்டாரத்தில் புதிய வீடுகளை வாங்குவோருக்குக் கடைகளும் பொழுதுபோக்கு வசதிகளும் அருகில் அமைந்திருக்கும் என்று ஆணையம் தெரிவித்தது.
யுஆர்ஏ நிலையத்தில் வரைவுப் பெருந்திட்டக் கண்காட்சி நடைபெறுகிறது. அடுத்த மாதம் (நவம்பர் 2025) 29ஆம் தேதிவரை அது நீடிக்கும்.
குடியிருப்புக்கான மூன்று கட்டுமானத் தளங்களுள் இரண்டில் முன்னாள் ஈசூன் தற்காலிகப் பேருந்து முனையம் இருக்கிறது. அது 2015ஆம் ஆண்டு மார்ச் 14 முதல் 2019 செப்டம்பர் 8 வரை செயல்பட்டது. இறுதிநாளில் முனையம், ஒருங்கிணைக்கப்பட்ட போக்குவரத்து நடுவத்திற்கு மாறியது. அந்த நடுவம் நார்த்பாயின்ட் சிட்டி கடைத்தொகுதியுடன் இணைக்கப்பட்டுள்ளது.
முன்னாள் முனையம் ஈசூன் எம்ஆர்டி நிலையத்திலிருந்து கிட்டத்தட்ட 300 மீட்டர் தொலைவில் உள்ளது. பின்னர் அது பராமரிப்புச் சேவை நிலையமாகப் பயன்படுத்தப்பட்டது. தற்போது அது காலியாக உள்ளது.
முன்னாள் முனையம் இருந்த தளத்தை இடிப்பதற்காக நியமிக்கப்பட்ட ஒப்பந்ததாரர், டிசம்பர் மாதம் அதனைக் கையகப்படுத்துவார் என்று எதிர்பார்க்கப்படுகிறது. பின்னர் 2027ஆம் ஆண்டு ஏப்ரல் 30க்குள் இடிக்கும் பணிகள் நிறைவுறும் என்று கூறப்படுகிறது.
இரண்டு தளங்களில் பெரியது, ஈசூன் சென்ட்ரலுக்கு அருகே உள்ளது. அதன் பரப்பளவு 1.35 ஹெக்டர். மற்றொரு தளம், நார்த்பாயின்ட் சிட்டிக்கு எதிர்ப்புறம் உள்ளது. அது 1.25 ஹெக்டர் பரப்பளவைக் கொண்டது. ஒவ்வொரு தளமும் இரண்டு காற்பந்துத் திடல்களைவிடச் சற்றுச் சிறியது.
தொடர்புடைய செய்திகள்
ஒவ்வொரு தளத்திலும் கிட்டத்தட்ட 300 வீடமைப்பு வளர்ச்சிக் கழக வீடுகள் அல்லது ஏறக்குறைய 400 கூட்டுரிமை வீடுகளைக் கட்டமுடியும் என்று நிபுணர்கள் கணிக்கின்றனர்.
மூன்றாவது குடியிருப்புத் தளத்தின் பரப்பளவு கிட்டத்தட்ட 3.2 ஹெக்டர். அது ஏறத்தாழ நாலரை காற்பந்துத் திடல்களுக்குச் சமம். அதன் ஒரு பகுதியில் தற்போது நீ சூன் விளையாட்டு நிலையம் உள்ளது.
மூன்றாவது தளத்தில் 750 முதல் 900 வரையிலான அடுக்குமாடி வீடுகள் அல்லது கிட்டத்தட்ட 1,100 கூட்டுரிமை வீடுகளைக் கட்டலாம் என்கின்றனர் சொத்து வல்லுநர்கள்.