மாணவர் முரசு
இ-பேப்பர்
‘ஆட்டிசம்’ எனப்படும் தொடர்புத்திறன் குறைபாடு கொண்ட 100 மாணவர்கள் 2026ஆம் ஆண்டு ஜனவரி மாதம் திறக்கப்படும் புதிய சிறப்புக் கல்விப் பள்ளியில் சேர்ந்து பயில்வர். இவர்கள் தொடக்கநிலை 1 மற்றும் தொடக்கநிலை 2 மாணவர்கள்.
புதிய பள்ளியை ஆங்கிலோ சீனப் பள்ளியும் மெத்தடிஸ்ட் நல்வாழ்வுச் சேவை ஆகியவை இணைந்து அமைக்கின்றன.
ஆங்கிலோ சீனப் பள்ளிகளில் இதுவே ஆகப் புதிய பள்ளி ஆகும்.
அதுமட்டுமல்லாது, தொடர்புத்திறன் குறைபாடு கொண்ட மாணவர்களுக்குத் தேசியப் பாடத்திட்டத்துக்கு உட்பட்ட பாடங்களை கற்பிக்கும் ஐந்தாவது சிறப்புக் கல்விப் பள்ளி ஆகும்.
தொடர்புத்திறன் குறைபாடு கொண்ட மாணவர்களுக்கு அறிவாற்றல் குறைபாடு இல்லை என்பதால் தேசியப் பாடத்திட்டத்துக்கு உட்பட்ட பாடங்கள் அவர்களுக்குக் கற்பிக்கப்படுகிறது.
கல்வி அமைச்சின் தேசியப் பாடத்திட்டத்துக்கு உட்பட்ட பாடங்களைக் கற்கும் மாணவர்கள் தொடக்கநிலை இறுதி ஆண்டுத் தேர்வு போன்ற தேசியத் தேர்வுகளை எழுத வேண்டும்.
புதிய பள்ளியான ஆங்கிலோ சீனப் பள்ளி (அகாதமி) அடுத்த ஆண்டு ஜனவரி மாதம், டெக் வாய் கிரசெண்ட்டில் உள்ள முன்னாள் சுவா சூ காங் உயர்நிலைப்பள்ளி அமைந்திருந்த இடத்தில் செயல்படத் தொடங்கும்.
தெங்காவில் உள்ள புதிய பள்ளிக் கட்டடத்துக்கு அது 2031ஆம் ஆண்டுக்குள் இடமாறும் என்று எதிர்பார்க்கப்படுகிறது. ஆங்கிலோ சீனத் தொடக்கப்பள்ளியும் அதே இடத்தில் இயங்கும்.
தொடர்புடைய செய்திகள்
2026ஆம் ஆண்டு மாணவர்களின் விண்ணப்பங்களை புதிய பள்ளி தற்போது ஏற்கிறது. விண்ணப்பத்துக்கான இறுதி நாள் ஆகஸ்ட் 31.
ஆங்கிலோ சீனப் பள்ளி (அகாதமி)யைத் தவிர்த்து செயிண்ட் ஆண்ட்ருஸ் மிஷன் பள்ளி, பாத்லைட் பள்ளி ஆகிய பள்ளிகளும் தொடர்புத்திறன் குறைபாடு கொண்ட மாணவர்களுக்கு தேசியப் பாடத்திட்டத்துக்கு உட்பட்ட பாடங்களைக் கற்பிக்கின்றன.
அண்மைய ஆண்டுகளில், சிங்கப்பூரில் தொடர்புத்திறன் கொண்ட மாணவர்களின் எண்ணிக்கை அதிகரித்துள்ள நிலையில் புதிய பள்ளி அமைக்கப்பட்டுள்ளது.