பாண்டான் நீர்தேக்கத்தில் முதலை புகைப்படம் போலி: புகாரளித்த பியுபி

பாண்டான் நீர்தேக்கத்தில் முதலை தென்பட்டதாகத் தகவல் அளிக்கப்பட்டபோது அதற்கு சான்றாக வியாழக்கிழமை (ஆகஸ்ட் 20) அளிக்கப்பட்ட புகைப்படம் போலியானது என்று பொதுப் பயனீட்டுக் கழகம் (பியுபி) அதன் விசாரணைகளில் கண்டறிந்துள்ளது.

அது குறித்து பியுபி காவல்துறையில் புகாரளித்துள்ளது என்று அதன் ஃபேஸ்புக்கில் வெள்ளிக்கிழமை (ஆகஸ்ட் 21) இரவு 8.45 மணியளவில் கழகம் பதிவிட்டுள்ளது.

“பொதுமக்களுக்கு அச்சத்தை ஏற்படுத்தி வழக்கமான நடவடிக்கைகளுக்கு தடங்கல் விளைவிக்கும் பொய்யான தகவல்களை பியுபி கடுமையான குற்றமாகக் கருதுகிறது. நாங்கள் தேடுதல் வேட்டையை நிறுத்திவிட்டதோடு காவல்துறையில் புகார் அளித்துள்ளோம்,” என்று அதன் பதிவில் பியுபி தெளிவுபடுத்தியது.

பாண்டான் நீர்த்தேக்கத்தில் ஆகஸ்ட் 20ஆம் தேதி முதல் நிறுத்திவைக்கப்பட்ட நீர் விளையாட்டு நடவடிக்கைகளுக்கான தடை மீட்டுக்கொள்ளப்பட்டு, அவை சனிக்கிழமை (ஆகஸ்ட் 22) முதல் மீண்டும் தொடங்கலாம் எனவும் கழகம் தெரிவித்தது.

பியுபியிடமிருந்து புகார் பெறப்பட்டதைக் காவல்துறை உறுதி செய்ததோடு விசாரணை தொடர்வதாகவும் தெரிவித்தது.

கடந்த வியாழக்கிழமை (ஆகஸ்ட் 20) அந்த நீர்தேக்கத்தில் முதலை ஒன்று காணப்பட்டதாக அன்றைய தினம் 3 மணியளவில் தகவல் கிடைத்தாகவும் அத்தகவலை தேசிய பூங்காக் கழகத்துடன் தாம் பகிர்ந்துகொண்டதாகவும் கழகம் விளக்கியது.

அதேநாளில் இரு அரசாங்க அமைப்புகளும் அங்கு நடக்கும் நீர் விளையாட்டு போன்ற பொது நடவடிக்கைகளுக்குத் தடை விதித்து கூட்டறிக்கை வெளியிட்டன. முதலையைத் தேடும் பணியையும் தொடங்கின.