மாணவர் முரசு
இ-பேப்பர்
சிங்கப்பூரின் முதல் சிறப்புக் கல்விப் பள்ளியான ‘பாத்லைட்’ (Pathlight), தெம்பனிசில் அதன் புதிய வளாகத்தைச் செவ்வாய்க்கிழமையன்று (நவம்பர் 18) அதிகாரபூர்வமாகத் திறந்தது.
‘ஆட்டிசம்’ எனும் மதியிறுக்கக் குறைபாடு உள்ள பிள்ளைகளுக்கு தேசிய பாடத்திட்டத்தை அது பயிற்றுவிக்கின்றது.
2004ஆம் ஆண்டு தொடங்கப்பட்ட அப்பள்ளி, அதன் 21வது ஆண்டு விழாவை நவம்பர் 18ஆம் தேதி கொண்டாடியது.
அப்பள்ளியின் தெம்பனிஸ் வளாகத்தில் நடந்த நிகழ்ச்சியில் சிறப்பு விருந்தினராகக் கல்வி அமைச்சர் டெஸ்மண்ட் லீ கலந்துகொண்டார்.
41 மாணவர்களுடன் தொடங்கப்பட்ட அப்பள்ளியில் தற்போது 2,100க்கும் மேற்பட்ட மாணவர்கள் படிக்கின்றனர்.
தெம்பனிஸ், அங் மோ கியோ ஆகிய இரு வட்டாரங்களில் அப்பள்ளி இயங்கி வருகிறது.
இவ்வாண்டு ஜனவரி மாதம் தெம்பனிசில் திறக்கப்பட்ட அப்பள்ளியில் கிட்டத்தட்ட 300 பிள்ளைகள் கல்வி பயில்கின்றனர்.
தற்போது திறக்கப்பட்டுள்ள புதிய வளாகத்தில் 800 மாணவர்கள்வரை பயிலலாம்.
தொடர்புடைய செய்திகள்
2032ஆம் ஆண்டுக்குள் பொங்கோல் வட்டாரத்தில் தன் புதிய வளாகத்தைப் பள்ளி திறக்கவிருக்கிறது.
தெம்பனிசில் திறக்கப்பட்டுள்ள புதிய வளாகம், அங் மோ கியோ உட்பட வருங்காலத்தில் திறக்கப்படவுள்ள பள்ளியின் வளாகங்களுக்கான யோசனைகளைச் சோதித்துச் செம்மைப்படுத்தும் ஓர் இடமாக இருக்கும் என ‘பாத்லைட்’ பள்ளியின் இணை நிறுவனரும் சிங்கப்பூர் மதியிறுக்கக் குறையுள்ளோர்க்கான வள நிலையத் (ஆர்க்) தலைவருமான திருவாட்டி டெனிஸ் புவா கூறினார்.
புதிய வளாகத்தின் முக்கிய அம்சங்களில் ‘ஆர்க்’ சமூக நிறுவனத்தின் பேராசிரியர் பிரான் நடத்தும் உணவகமும் அடங்கும்.
அங்கு மூத்த மாணவர்களும் முன்னாள் மாணவர்களும் உணவு உற்பத்தித் தொழில்நுட்பத்தை எவ்வாறு பயன்படுத்துவது என்பதைக் கற்றுக்கொள்ளலாம்.
மாணவர்களுக்கு மூத்தோர், சமூகத்துடனான தொடர்புகளை ஊக்குவிப்பதற்காக, 2026ஆம் ஆண்டு தெம்பனிஸ் வளாகத்தில் வெளிப்புற வசதிகள் கொண்ட ஓர் இடத்தைக் கட்ட அப்பள்ளி நிர்வாகம் திட்டமிட்டுள்ளது.
29 பொதுக் கல்விப் பள்ளிகள், 24 சிறப்புக் கல்விப் பள்ளிகள் ஆகியவற்றின் பங்காளித்துவத்துடன் ‘பாத்லைட்’ உருவாகியுள்ளதாகக் கல்வி அமைச்சர் லீ கூறினார்.
மேலும், பாத்லைட்டின் கலைஞர் மேம்பாட்டுத் திட்டத்தையும் அவர் பாராட்டினார்.
மாணவர்களின் படைப்புகளை வர்த்தக ரீதியில், ‘த ஆர்ட் ஃபேக்கல்ட்டி’ சமூக நிறுவனம் மூலம் விற்க அத்திட்டம் அனுமதிக்கிறது. மாணவர்களுக்கு அவர்களின் படைப்புகளிலிருந்து வருமானம் ஈட்ட அது வகைசெய்கிறது.