மாணவர் முரசு
இ-பேப்பர்
போதைப்பொருள் சட்டம் திருத்தி, மேம்படுத்தப்பட்டு சில நாள்கள் கடந்துள்ள நிலையில், எட்டோமிடேட் கொண்டுள்ள 43 மின்சிகரெட்டுகளை வைத்திருந்ததாக ஒருவர் மீது குற்றம் சாட்டப்பட்டுள்ளது
40 வயதுடைய டெரெக் கோர் பூன் சுன், போதைப்பொருளின் தவறான பயன்பாட்டுச் சட்டத்தின் கீழ், எட்டோமிடேட் கொண்டுள்ள பொருள்களைக் கடத்தும் நோக்கத்துடன் அவற்றைத் தன்னுடன் வைத்திருந்ததன் பேரில் திங்கட்கிழமை (செப்டம்பர் 8) குற்றம் சாட்டப்பட்டார்.
சனிக்கிழமை, அங் மோ கியோ அவென்யூ 4ல் வாகன நிறுத்தத்தில் பிடிபட்ட கோர், மத்திய காவல்துறை பிரிவில் தடுத்துவைக்கப்பட்டார். அவரது வழக்கு செப்டம்பர் 15 ஆம் தேதி தொடரும்
குற்றவாளி என நிரூபிக்கப்பட்டால், அந்த சிங்கப்பூரருக்கு இரண்டு முதல் 10 ஆண்டுகள் வரை சிறைத்தண்டனை விதிக்கப்படலாம். அத்துடன் அவருக்கு இரண்டு முதல் ஐந்து பிரம்படிகள் விதிக்கப்படலாம்.
செப்டம்பர் 1ஆம் தேதிக்கு முன்னர் எட்டோமிடேட் பயன்பாடு, நச்சுப்பொருள் சட்டத்தின் கீழ் அடங்கியிருந்தது.
முன்னைய சட்டத்தின் கீழ், எட்டோமிடேட் கொண்ட கருவிகளை வைத்திருந்தவர்களும் அவற்றைப் பயன்படுத்தியவர்களும் இரண்டு ஆண்டுகள் வரை சிறைத்தண்டனை, $10,000 வரை அபராதம் அல்லது இரண்டையும் எதிர்நோக்கினர்.
போதைப்பொருளின் தவறான பயன்பாட்டுச் சட்டத்தின்கீழ், எட்டோமிடேட் வகுப்பு ‘சி’ மருந்தாக வகைப்படுத்தப்படும் என்று சுகாதார அமைச்சர் ஓங் யி காங், கடந்த ஆகஸ்ட் 24ல் அறிவித்தார்.
இந்த வகைப்பாட்டின் கீழ் உள்ள வேதிப்பொருள்கள், வகுப்பு ‘ஏ’ மற்றும் ‘பி’ பொருள்களைவிட குறைந்த தீங்கு விளைவிக்கக்கூடியவை. ஆனால் அவை இன்னமும் ஆபத்தானதாகக் கருதப்படுவதால் கடுமையான கட்டுப்பாட்டிற்கு உட்படுத்தப்பட்டுள்ளன.
தொடர்புடைய செய்திகள்
‘சி’ வகையின் கீழ் வகைப்படுத்தப்பட்ட மற்ற மருந்துகளில் தூக்க மருந்தான எரிமின்-5 (Erimin-5) (நிமெட்டாசெபம்) அடங்கும்.
திருத்தப்பட்ட சட்டத்தின்கீழ், எட்டோமிடேட்டைத் தவறாகப் பயன்படுத்துவோர் கடுமையான தண்டனையை எதிர்கொள்வர். அதிகபட்சமாக, 10 ஆண்டுகள் சிறைத்தண்டனையுடன் $20,000 அபராதம் தண்டனையில் அடங்கும்.
மின்சிகரெட்டுகள் தொடர்பான குற்றங்கள் குறித்து புகாரளிக்க, சுகாதார அறிவியல் ஆணையத்தின் அவசர எண்ணை, தினமும் காலை 9 மணி முதல் இரவு 9 மணி வரை (பொது விடுமுறை நாள்கள் உட்பட) 6684-2036 அல்லது 6684-2037 என்ற எண்ணில் அழைக்கலாம்.
www.go.gov.sg/reportvape என்ற இணையத் தளத்திலும் புகார்களைச் சமர்ப்பிக்கலாம்.