மாணவர் முரசு
இ-பேப்பர்
இந்தியாவிற்கு மூன்று நாள் அதிகாரத்துவப் பயணம் மேற்கொண்டுள்ள பிரதமர் லாரன்ஸ் வோங், அந்நாட்டின் தேசத் தந்தையாகப் போற்றப்படும் மகாத்மா காந்தியின் நினைவிடத்திற்குச் சென்று மரியாதை செலுத்தினார்.
இந்தியத் தலைநகர் புதுடெல்லியிலுள்ள மகாத்மா காந்தி நினைவிடமான ‘ராஜ்காட்’டிற்கு புதன்கிழமை (செப்டம்பர் 3) காலை 10 மணியளவில் தம் துணைவியார் லூ ட்சு லுயி, போக்குவரத்து தற்காலிக அமைச்சர் ஜெஃப்ரி சியாவ், வெளியுறவு அமைச்சு, வர்த்தக, தொழில் துணை அமைச்சர் கான் சியாவ் ஹுவாங் ஆகியோருடன் சென்று மலர் வளையம் வைத்து அவர் மரியாதை செலுத்தினார். ஒரு நிமிட மௌன அஞ்சலிக்குப்பின், மலர் தூவி அங்கிருந்து விடைபெற்றார்.
‘ராஜ்காட்’ நினைவிடச் செயலாளர் ரஜ்னீஷ் குமார், பிரதமருக்கு மகாத்மா காந்தியின் உருவச் சிலையையும் அவரைப் பற்றி நூல்தொகுப்பையும் நினைவுப்பரிசாக வழங்கினார்.
திருமதி வோங்கிற்கு நூல் ராட்டின நினைவுப்பரிசு வழங்கப்பட்டது.
சிங்கப்பூர் - இந்தியா இடையிலான 60 ஆண்டு நட்புறவைக் கொண்டாடும் வண்ணம் அமைந்துள்ள இந்தப் பயணத்தில், இந்தியப் பிரதமர் நரேந்திர மோடி, அதிபர் திரௌபதி முர்மு, அமைச்சர்கள் பலரையும் திரு வோங் சந்திக்கவிருக்கிறார்; பல புரிந்துணர்வு ஒப்பந்தங்களும் கையெழுத்தாக உள்ளன.
இந்திய தொழில்துறைத் தலைவர்களுடனான வட்டமேசைக் கலந்துரையாடலும் புதன்கிழமை நடைபெற்றது.
இந்தியாவில் வசித்துவரும் சிங்கப்பூரர்களுடனான எஸ்ஜி60 விருந்தில் பிரதமர் வோங் புதன்கிழமை இரவு கலந்துகொள்கிறார்.
கிட்டத்தட்ட 200 சிங்கப்பூரர்கள் அவ்விருந்து நிகழ்ச்சியில் பங்கேற்கின்றனர். புதுடெல்லியில் நடைபெறும் அவ்விருந்து நிகழ்ச்சியில் கலந்துகொள்வதற்காக சென்னை, மும்பை, அகமதாபாத், பெங்களூரு, கோல்கத்தா, புனே போன்ற நகரங்களிலிருந்தும் அவர்கள் வந்துள்ளனர்.
தொடர்புடைய செய்திகள்
இந்தியாவின் பகுதி மின்கடத்தித் துறைக்கு உலகளாவிய முதலீடுகளை ஈர்க்கவும், அத்துறையில் புத்தாக்கத்தை ஊக்குவிக்கவும், உத்திமுறையில் முதன்மையானதாக அத்துறையில் இறக்குமதிகளைக் குறைக்கும் நோக்கிலும் உலகின் முன்னணி நிர்வாகிகள் பங்கேற்கும் ‘செமிகொன்’ மாநாட்டிற்கு வருகை தந்துள்ள கிட்டத்தட்ட 20 சிங்கப்பூரர்களும் இந்த விருந்தில் கலந்துகொள்கின்றனர்.