மாணவர் முரசு
இ-பேப்பர்
நீதிமன்றத் தீர்ப்புகளை மட்டுப்படுத்துவதும் இழிவுபடுத்துவதும் தவறு என்று சட்ட அமைச்சர் எட்வின் டோங் தெரிவித்துள்ளார்.
உலகின் எந்த நீதிமன்றத்தைக் காட்டிலும் பெரிது பொதுமக்களின் தீர்ப்பு என்று பாட்டாளிக் கட்சித் தலைமைச் செயலாளர் பிரித்தம் சிங், சேனல் நியூஸ்ஏஷியாவின் ‘த அசெம்பிளி’ தொலைக்காட்சி நிகழ்ச்சி ஒன்றில் கூறியதற்கு திரு டோங் இவ்வாறு பதிலளித்துள்ளார்.
பாட்டாளிக் கட்சியின் முன்னாள் நாடாளுமன்ற உறுப்பினர் ரயீசா கானின் பொய்யுரை சம்பந்தப்பட்ட திரு சிங்கின் வழக்கு குறித்து கேட்கப்பட்டதற்கு இரண்டாம் உள்துறை அமைச்சருமான திரு டோங் அவ்வாறு கூறியிருந்தார்.
நீதிமன்றத்தில் நவம்பர் 4ஆம் தேதி நிகழ்ந்த திரு சிங்கின் மேல்முறையீட்டுக்குப் பிறகு அந்த நிகழ்ச்சி பதிவு செய்யப்பட்டது. மேல்முறையீட்டின் தீர்ப்பு இன்னும் வெளியாகவில்லை.
இந்த விவகாரம் தொடர்பில் திரு சிங், “என் நற்பெயரையும் என் கட்சியின் நற்பெயரையும் கீழறுக்க என் அரசியல் எதிராளிகள் எதுவேண்டுமானாலும் செய்வர். ஆனால், நீங்கள் உங்கள் மனசாட்சிக்கு முதலில் பதில் சொல்லவேண்டும். உங்கள் மனசாட்சியில் களங்கமில்லை என்றால் உங்கள்மீது மக்கள் எதை வேண்டுமானாலும் தூக்கி எறியட்டும், நீங்கள் தொடர்ந்து நிற்பீர்கள்,” என்று கூறினார்.
மக்கள் கழக நிகழ்ச்சி ஒன்றின்போது இடையில் செய்தியாளர்களிடம் பேசிய திரு டோங், திரு சிங்கின் கூற்று ‘முறைகேடானது, முற்றிலும் தவறானது, ஏற்கத்தகாதது’ எனச் சாடினார்.
நீதிமன்ற முடிவை பொதுமக்கள் கருத்து வென்றுவிடலாம் என்ற சிந்தனை ஆபத்தானது என்றும் அவர் எச்சரித்தார்.
“திரு சிங் விசாரணைக்கு உட்படுத்தப்பட்டு குற்றம் சாட்டப்பட்டார். முழுமையான, வெளிப்படையான விசாரணைக்குப் பின் நாடாளுமன்ற சிறப்புக் குழுவினரிடம் பொய்யுரைத்த குற்றத்தை அவர் புரிந்ததாக நீதிமன்றம் உறுதி செய்தது.”
தொடர்புடைய செய்திகள்
குற்றத்தை உறுதி செய்வதற்கான முகாந்திரத்தை நீதிபதி விரிவாக விளக்கியுள்ளதாகக் குறிப்பிட்ட திரு டோங், இன்றைய நிலவரப்படி அவரது தீர்ப்பு செல்லுபடியானது என்றும் இணங்கத்தக்கது என்றும் கூறினார்.
நாடாளுமன்ற சிறப்புரிமைக் குழுவினரிடம் வேண்டுமென்றே பொய்யுரைத்ததன் பேரில் அவருக்கு 14,000 வெள்ளி அபராதம் விதிக்கப்பட்டது.
“பெருந்திரள்வாதிகள் (populist) சிலர், நீதிமன்ற தீர்ப்புகள் தங்களுக்கு எதிராக விதிக்கப்படும்போது நீதிமன்றங்களையும் நீதிபதிகளையும் இவ்வாறு தாக்குவதை நாம் உலகம் முழுவதிலும் காண்கிறோம்,” என்று திரு டோங் கூறினார்.
“(அத்தகையோர்) தாங்கள் சட்டத்திற்கு அப்பாற்பட்டவர்கள் என நினைக்கலாம். ஆனால் சிங்கப்பூரில் இத்தகைய பொறுப்பற்ற அரசியலுக்கு இடமில்லை,” என்று அவர் கூறினார்.
“நேர்மை, நாணயத்தின் அடிப்படையில் சிங்கப்பூர் எழுப்பப்பட்டுள்ளது. ஆனால் திரு சிங், தம் கருத்துகளால் நம் நீதிமன்றங்களின் நம்பகத்தன்மையைக் குறைக்க முற்படுகிறார்,” என்றார் திரு டோங்.
சிங்கப்பூரின் கட்டமைப்பு, சட்டச் செயலாக்கம், நீதித்துறை ஆகியவற்றின் மீதான பொதுமக்கள் நம்பிக்கையைத் திரு சிங்கின் கருத்துகள் குறைப்பதாகத் திரு டோங் கூறினார்.
உண்மைத் தகவல்களின் அடிப்படையில் இங்குள்ள நீதிமன்றம் தீர்ப்பு வழங்கும் எனக் கூறிய அமைச்சர், எதிர்க்கட்சித் தலைவரோ அமைச்சரோ எவருமே சட்டத்திற்கு அப்பாற்பட்டவர்கள் அல்லர் எனத் திரு டோங் தெரிவித்தார்.
திரு சிங் தவறு செய்யாவிட்டால் அவ்வாறே நீதிமன்றம் முடிவு செய்து தீர்ப்பளிக்கும் என்றும் திரு டோங் கூறினார்.
“அரசியல்வாதிகளுக்கெனத் தனி நீதிமன்றம் இல்லை,” என்று அவர் குறிப்பிட்டார்.