குவீன்ஸ்டவுன் தனித்தொகுதியில் எரிக் சுவா அபார வெற்றி

இந்தப் பொதுத் தேர்தலில் புதிதாக உருவாக்கப்பட்ட தனித்தொகுதிகளில் ஒன்றான குவீன்ஸ்டவுன் தனித்தொகுதியில் மக்கள் செயல் கட்சி வாகை சூடியுள்ளது.

கடந்த தேர்தலில் தஞ்சோங் பகார் தொகுதியில் களமிறங்கிய கலாசார, சமூக, இளையர்துறை மற்றும் சமுதாய, குடும்ப மேம்பாட்டு அமைச்சுகளின் மூத்த நாடாளுமன்றச் செயலாளர் எரிக் சுவா, இம்முறை குவீன்ஸ்டவுன் தொகுதியில் சீர்திருத்த மக்கள் கட்சியின் வேட்பாளர் மஹபூப் பாட்ஷாவை எதிர்கொண்டார்.

திரு சுவா 81.12 விழுக்காடு வாக்குகளைப் பெற்று குவீன்ஸ்டவுன் தொகுதியின் நாடாளுமன்ற உறுப்பினரானார்.

அவரை எதிர்த்துப் போட்டியிட்ட திரு பாட்ஷா 18.88 விழுக்காட்டு வாக்குகளுடன் தோல்வியைத் தழுவினார்.

திரு சுவா 20,900 வாக்குகளையும் திரு பாட்ஷா 4,864 வாக்குகளையும் பெற்றனர்

இதற்கிடையே, குவீன்ஸ்டவுன் தொகுதிவாசிகளுக்காக வைத்திருக்கும் நலத்திட்டங்கள் குறித்து தமிழ் முரசு எழுப்பிய கேள்விக்கு பதிலளித்த திரு சுவா, குவீன்ஸ்டவுன் வாக்காளர் குடும்பம் அளித்த வலுவான ஆதரவுக்கு நன்றி தெரிவித்தார்.

மூத்தோர் நலன் மேம்பாடு, வசதிகுறைந்த குடும்பங்களுக்கு வளமான ஆதரவு, அவ்வட்டாரத்தில் நிலவும் உணவங்காடிப் பாரம்பரியம், அதனுடன் உணவங்காடித் திருவிழாவைப் பேணுவது ஆகியவை அடுத்த சில ஆண்டுகளில் அத்தொகுதியில் தாம் கொண்டுவர முற்படும் முக்கியத் திட்டங்களில் இடம்பிடிக்கும் என்று திரு சுவா குறிப்பிட்டார்.