மாணவர் முரசு
இ-பேப்பர்
சிங்கப்பூரில் முதன்முதலாக 1984ஆம் ஆண்டு தொல்லியல் அகழாய்வை மேற்கொண்ட புகழ்பெற்ற தொல்லியல் வல்லுநரும் பேராசிரியருமான ஜான் மிக்சிச் சனிக்கிழமை (அக்டோபர் 25) காலமானார். அவருக்கு வயது 79.
நுரையீரல் அழற்சியால் டாக்டர் மிக்சிச் உயிரிழந்துவிட்டதாக அவரின் துணைவியாரும் நன்யாங் தொழில்நுட்பப் பல்கலைக்கழகத்தின் வரலாற்று இணைப் பேராசிரியருமான கோ கியோக் இயன் தெரிவித்தார்.
கடந்த நான்கு ஆண்டுகளாக ‘மெலனோமா’ எனும் தோல் புற்றுநோயால் டாக்டர் மிக்சிச் பாதிக்கப்பட்டிருந்ததாகவும் அவர் குறிப்பிட்டார்.
தங்களுக்குக் குழந்தைகள் இல்லை என்றபோதும் தாம் வளர்த்த ஒரு பூனையை டாக்டர் மிக்சிச் மிகவும் நேசித்தார்.
அவர் சிங்கப்பூர்த் தேசியப் பல்கலைக்கழகத்தின் தென்கிழக்கு ஆசிய கல்விக்கழகத்தில் ஓய்வுபெற்ற கௌரவப் பேராசிரியராகப் பணியாற்றி வந்தார்.
தொல்லியல், மானுடவியல், வரலாறு, நிலவியல், நிலவியற்பியல் உள்ளிட்ட துறைகளில் அவர் ஆய்வுகளை மேற்கொண்டார்.
கடந்த 2018ஆம் ஆண்டில் டாக்டர் மிக்சிச்சை மணந்துகொண்ட டாக்டர் கோ, தம் கணவர் அவரது பணியை மிகவும் நேசித்தார் என்றும் எழுதுவதற்குச் சிரமப்பட்டபோதும் அவர் தொடர்ந்து வேலைசெய்தார் என்றும் சொன்னார்.
கெடாவின் அமைதிப் படையில் இருந்தபோது 1968ஆம் ஆண்டு முதன்முறையாகச் சிங்கப்பூருக்கு வந்த டாக்டர் மிக்சிச், பின்னர் 1987ஆம் ஆண்டுமுதல் இங்கேயே தங்கிவிட்டார்.
தொடர்புடைய செய்திகள்
இங்கிருந்த காலகட்டத்தில், சிங்கப்பூர் வரலாற்றின் முன்னோடி வல்லுநர்களில் ஒருவராக அவர் விளங்கினார்.
சிங்கப்பூரில் முதன்முறையாக ஃபோர்ட் கேனிங்கில் அகழாய்வு நடத்துவதற்கு டாக்டர் மிக்சிச் அழைக்கப்பட்டார் என்று தேசியப் பல்கலைக்கழக இணையத்தளத்தில் இடம்பெற்றுள்ள கட்டுரை ஒன்று தெரிவிக்கிறது.
ஜூரோங் வெஸ்ட் ஸ்திரீட் 64, புளோக் 660Eயில் உள்ள பன்னோக்கு மண்டபத்தில் டாக்டர் மிக்சிச்சின் துக்க விழிப்புச் சடங்கு இடம்பெறுகிறது.
அவரது இறுதிச் சடங்கு அக்டோபர் 29ஆம் தேதி நடைபெறும். அதன்பின் அன்றே மண்டாய் தகனச்சாலையில் அவரது நல்லுடல் எரியூட்டப்படும்.