மாணவர் முரசு
இ-பேப்பர்
பாத்தாமிலிருந்து 165 பயணிகளுடன் சிங்கப்பூர் வந்துகொண்டிருந்த படகும் மற்றொரு கப்பலும் மோதிக்கொண்டன.
இச்சம்பவம் திங்கட்கிழமை (நவம்பர் 10) மாலை 5 மணிவாக்கில் சிங்கப்பூரின் கட்டுப்பாட்டிற்குள் இருக்கும் கடல் பகுதியில் நடந்தது.
இந்நிலையில், சம்பவம் குறித்து சிங்கப்பூர்க் கடல்துறை, துறைமுக ஆணையம் செவ்வாய்க்கிழமை (நவம்பர் 11) அறிக்கை வெளியிட்டது.
படகு ஹார்பர்ஃபிரண்ட் முனையத்துக்கு வரும் வழியில் தென் தீவுப் பகுதியில் கப்பலுடன் மோதியது.
எம்வி ஹொரைசன் 9 (MV Horizon 9) என்று அழைக்கப்படும் அந்தப் படகில் ஏழு பணியாளர்களும் இருந்தனர்.
மார்ஷல் தீவுகளின் கொடியை ஏந்திய எல்ஏ டீக் (LA Digue) ரசாயனக் கப்பல்மீது ‘எம்வி ஹொரைசன் 9’ மோதியதாகப் பாத்தாம் ஊடகங்கள் செய்தி வெளியிட்டுள்ளன.
சம்பவம் குறித்து பாத்தாம் கடல்துறை, துறைமுக ஆணையத்திற்கு இரவு 7.30 மணிக்குத் தகவல் வந்ததாகக் குறிப்பிடப்பட்டது.
படகு மற்றும் கப்பலில் இருந்த அனைவரும் பாதுகாப்பாக வெளியேற்றப்பட்டனர். அவர்கள் சிங்கப்பூரின் ஹார்பர்ஃபிரண்ட் முனையத்திற்கு அழைத்து வரப்பட்டனர்.
தொடர்புடைய செய்திகள்
‘எம்வி ஹொரைசன் 9 ‘படகுக்குச் சேதம் ஏற்பட்டதாகத் தெரிவிக்கப்பட்டது. படகு பாத்தாமிலிருந்து 3.30 மணிவாக்கில் புறப்பட்டது.
எதனால் விபத்து ஏற்பட்டது, விபத்தால் கடல் சுற்றுச்சுழலுக்கு ஏதேனும் பாதிப்பு ஏற்பட்டதா என்பன குறித்து விசாரணை நடத்தப்பட்டு வருகிறது என்று பாத்தாம் ஆணையம் தெரிவித்தது. மேலும், சிங்கப்பூர் ஆணையத்திடமும் ஹொரைசன் படகுச் சேவை நிறுவனத்துடனும் பேசிவருவதாக அது கூறியது.
மோதலுக்கு முன்பு, படகு திடீரென இடதுபுறமாகத் திரும்பியதாக படகில் இருந்த பயணி திரு ஜுனைடி, ட்ரெய்ட்ஸ் டைம்சிடம் தெரிவித்தார்.
பின்னர் படகின் இயந்திரம் நிறுத்தப்பட்டதாக அவர் கூறினார். எண்ணெய்க் கப்பலை நோக்கி பக்கவாட்டில் படகு செல்வதைத் தான் கவனித்ததாக 43 வயதான ஜுனைடி மேலும் கூறினார்.
மோதலின் போது ஒரு பெரிய சத்தம் கேட்டதாக அவர் கூறினார்.
“சேதம் மிகவும் மோசமாக இருப்பதாக நாங்கள் ஆரம்பத்தில் நினைத்ததால், படகில் சிறிது சலசலப்பு ஏற்பட்டது,” என்று திரு ஜுனைடி விவரித்தார்.
இருப்பினும், படகு சிறிதளவு சேதத்தை மட்டுமே சந்தித்துள்ளதாக படகின் ஊழியர்கள் பயணிகளுக்கு உறுதியளித்தனர்.
பின்னர் அதிகாரிகள் படகை பாதுகாப்பாக ஹார்பர்ஃபிரண்ட் முனையத்திற்கு கொண்டு சென்றதாக திரு ஜுனைடி கூறினார்.