மாணவர் முரசு
இ-பேப்பர்
மத்திய கிழக்கு போன்ற வட்டாரங்களில் நிலவும் சர்ச்சைகள் வெளிநாட்டுத் தலையீடு, பயங்கரவாதம் தொடர்பான அச்சுறுத்தல்களை அதிகரித்துள்ளன.
இந்நிலையில், அண்மையில் அதிகரித்துள்ள போதைப்பொருள் கலந்த மின்சிகரெட்டுகள், மோசடிகள், மோசமடையும் சாலைப் பாதுகாப்பு நிலவரம் போன்ற உள்நாட்டுச் சவால்களைச் சிங்கப்பூர் எதிர்கொள்கிறது.
செப்டம்பர் 5ஆம் தேதி நாட்டின் 15வது நாடாளுமன்றத்தைத் தொடங்கி வைத்து ஆற்றிய உரையில் இந்த விவகாரங்களைச் சுட்டிய அதிபர் தர்மன் சண்முகரத்னம், நாட்டைப் பாதுகாப்பதும் உலக அரங்கில் அதன் நிலையைத் தக்கவைத்துக் கொள்வதும் சிங்கப்பூரின் முன்னுரிமை என்று கூறியிருந்தார்.
அதற்குப் பதிலளிக்கும் விதமாக, சிங்கப்பூரின் சட்டங்களைத் தொடர்ந்து வலுப்படுத்த விருப்பதாகவும் இத்தகைய அச்சுறுத்தல்களைச் சமாளிக்கப் பங்காளித்துவங்களை ஆழப்படுத்தி, தொழில்நுட்பங்களைக் கட்டுப்படுத்தவிருப்பதாகவும் உள்துறை அமைச்சு வெள்ளிக்கிழமை (செப்டம்பர் 19) வெளியிட்ட பிற்சேர்க்கையில் தெரிவித்தது.
புதிதாக மாற்றம் கண்டுவரும் வெளிநாட்டுத் தலையீட்டு உத்திகளைச் சமாளிக்கும் விதமாக வெளிநாட்டுத் தலையீடு (எதிர்நடவடிக்கைகள்) சட்டம் (Fica) திருத்தப்படும் என்று உள்துறை அமைச்சர் கா. சண்முகம் அந்தப் பிற்சேர்க்கையில் குறிப்பிட்டுள்ளார்.
2021ஆம் ஆண்டு ஒப்புதல் பெற்ற அந்தச் சட்டம், வெறுப்புணர்வைத் தூண்டும் தகவல்களைக் கொண்ட பிரசாரங்கள், உள்ளூர்ப் பிரதிநிதிகளைப் பயன்படுத்துதல் ஆகிய நடவடிக்கைகள் மூலம் உள்நாட்டு அரசியலில் தலையிடும் போக்கைக் கையாள உதவுகிறது.
அந்தச் சட்டத்தின்கீழ், அரசியல் முக்கியத்துவம் வாய்ந்தவராக ஒருவரை அறிவிக்க முடியும். அவ்வாறு அறிவிக்கப்பட்டவர் தான் வழங்கிய அரசியல் நன்கொடைகள், வெளிநாட்டுத் தொடர்புகள் போன்ற விவரங்களை வெளிப்படையாகத் தெரிவிக்க வேண்டியது அவசியம்.
உலகளாவிய பாதுகாப்புச் சூழல் மேலும் அதிகமாக மாற்றம் கண்டு வருவதாகப் பிற்சேர்க்கையில் அமைச்சர் சண்முகம் குறிப்பிட்டார். புவிசார் அரசியல் பிளவுகள் ஆழமாவதையும் இன, சமயப் பிரிவினைகள் ஏற்படும் அபாயங்கள் அதிகரிப்பதையும் அவர் சுட்டினார்.
தொடர்புடைய செய்திகள்
இத்தகைய சூழலைப் பயன்படுத்தி, பயங்கரவாதிகளும் தீவிரவாதிகளும் மற்றவர்களைத் தங்கள் சித்தாந்தங்களின்பால் ஈர்த்து, வன்முறையைத் தூண்டுகின்றனர். இளையர்கள் இத்தகைய சித்தாந்தங்களின்பால் ஈர்க்கப்படுவதைத் தடுக்கும் நடவடிக்கைகளைக் கல்வி அமைச்சுடன் இணைந்து உள்நாட்டுப் பாதுகாப்புத் துறையும் எஸ்ஜிசெக்யூர் திட்ட அலுவலகமும் மேற்கொள்வதாக அவர் குறிப்பிட்டார்.
மோசமடையும் சாலைப் பாதுகாப்பு நிலவரம், மோசடிகள், போதைப்பொருள் போன்றவற்றைச் சமாளிக்கவும் தமது அமைச்சு சட்டங்களை மேலும் வலுவாக்குவதாக அமைச்சர் சொன்னார்.
இந்த ஆண்டின் (2025) முற்பாதியில் வேக வரம்பை மீறிய 118,000க்கும் மேற்பட்ட சம்பவங்கள் பதிவாகின. ஓராண்டுக்கு முன்புடன் ஒப்புநோக்க இது கிட்டத்தட்ட 50 விழுக்காடு அதிகம்.
தீவிர அமலாக்க நடவடிக்கைகளுக்குப் பிறகும் நிலைமையில் முன்னேற்றம் இல்லை என்கிறது போக்குவரத்துக் காவல்துறை.
இந்நிலையில் அடுத்த ஆண்டு சாலைப் போக்குவரத்துச் சட்டத்தில் திருத்தங்கள் செய்யப்படும் என்றும் அதன் பிறகு நிலைமை மாறும் என்று எதிர்பார்க்கப்படுவதாகவும் திரு சண்முகம் கூறினார்.
இதற்கிடையே, கலாசார, சமூக, இளையர்துறை அமைச்சின் பிற்சேர்க்கையில், கலாசாரங்களுக்கு இடையிலான, சமயங்களுக்கு இடையிலான புரிதலைப் பேண முக்கியத்துவம் அளிக்கப்படும் என்று குறிப்பிடப்பட்டுள்ளது.
‘எஸ்ஜி கலாசார சிறப்புத்தொகை’ போன்ற திட்டங்களின் வாயிலாகவும் விளையாட்டுகள் மூலமாகவும் சமூகங்களை இணைக்கும் முயற்சிகள் மேற்கொள்ளப்படும் என்று கூறப்பட்டது.
சிங்கப்பூர் அரசாங்கப் பங்காளித்துவ அலுவலகம் மூலம் பங்காளித்துவங்களை விரிவுபடுத்தவும் சமூகத் தொண்டூழியர் திட்டத்தின் மூலம் சமூகத் தலைவர்களுக்குப் பயிற்சி அளிக்கவும் திட்டங்கள் வகுக்கப்படும் என்று தெரிவிக்கப்பட்டது.