மாணவர் முரசு
இ-பேப்பர்
சிங்கப்பூரிலுள்ள முக்கிய துறைகளின் ஏற்றுமதி அக்டோபர் மாதம், முன்னுரைப்புகளைப் பின்னுக்குத் தள்ளி, 22 விழுக்காடு என்னும் வலுவான வளர்ச்சியைப் பதிவு செய்துள்ளது.
மின்னணு மற்றும் மின்னணு சாராத பொருள்களின் ஏற்றுமதி எதிர்பார்க்கப்பட்டதைக் காட்டிலும் அதிக வளர்ச்சி கண்டது அதற்கு முக்கிய காரணம்.
எண்ணெய் சாராத ஏற்றுமதி, ஆண்டுக்காண்டு அடிப்படையில் 22.2 விழுக்காடு வளர்ந்ததை ‘எண்டர்பிரைஸ் சிங்கப்பூர்’ அமைப்பு திங்கட்கிழமை (நவம்பர் 17) வெளியிட்ட தரவுகள் காட்டின.
செப்டம்பர் மாத 7 விழுக்காட்டு வளர்ச்சியைத் தொடர்ந்து இது பதிவானது.
அக்டோபரிலும் கிட்டத்தட்ட அதே அளவில் 7.5 விழுக்காட்டு வளர்ச்சி காணப்படும் என்று புளூம்பெர்க் நடத்திய ஆய்வில் பங்கேற்ற பொருளியல் நிபுணர்கள் முன்னுரைத்து இருந்தனர்.
மின்னணுத் தயாரிப்புகளின் ஏற்றுமதி தொடர்ந்து வளர்ந்து வருகிறது. செப்டம்பரில் 30.4 விழுக்காடாக இருந்த அது அக்டோபரில் 33.2 என்று சிறிய ஏற்றம் கண்டது.
கணினி ஏற்றுமதி 77.7 விழுக்காடு அதிகரித்தது அதற்கு முக்கிய காரணம்.
அதேபோல, மருந்தியல் தயாரிப்புகள் பெரும்பங்கு வகிக்கும் மின்னணு சாராத தயாரிப்புகளின் ஏற்றுமதியும் ஆண்டுக்காண்டு அடிப்படையில் அக்டோபர் மாதம் 18.8 விழுக்காடு வளர்ச்சியைப் பதிவு செய்தது.
தொடர்புடைய செய்திகள்
செப்டம்பரில் அது அரை விழுக்காடு மட்டுமே அதிகரித்து இருந்தது.
மின்னணு சாராத பொருள்களில் தங்கம் ஏற்றுமதி 176.8 விழுக்காடு என்னும் மிதமிஞ்சிய வளர்ச்சியை எட்டியது. அதற்கு அடுத்து, மருந்தியல் தயாரிப்புகள் 25.2 விழுக்காடும் இயந்திரத் தயாரிப்புகள் 16.1 விழுக்காடும் அதிகமாக ஏற்றுமதி செய்யப்பட்டன.
தைவானுக்கான ஏற்றுமதி 31.9 விழுக்காடு என்னும் செப்டம்பர் அளவிலிருந்து 61.5 விழுக்காட்டுக்கு அதிகரித்தது. தனித்துவ இயந்திர ஏற்றுமதிகள் அதிகரித்தது அதற்கு முக்கிய காரணம்.
தாய்லாந்துக்கான சிங்கப்பூரின் ஏற்றுமதியும் 91.1 விழுக்காடு விரிவடைந்தது. செப்டம்பரில் அது 23.9 விழுக்காட்டு வளர்ச்சியைப் பதிவு செய்திருந்தது.
இருப்பினும், சிங்கப்பூரின் ஆகப்பெரிய ஏற்றுமதிச் சந்தையான அமெரிக்காவுக்கான முக்கிய தயாரிப்புகளின் ஏற்றுமதி அக்டோபரில் 12.5 விழுக்காடு சரிந்தது. ஜப்பானுக்கான ஏற்றுமதியிலும் 0.1 விழுக்காடு இறக்கம் காணப்பட்டது.