மாணவர் முரசு
இ-பேப்பர்
இன, சமயப் பிளவுகள் எவ்வாறு பல நாடுகளில் வெளிப்பட்டுள்ளன என்பதை அறிந்த நிலையில் சிங்கப்பூரில் அப்படி ஒருபோதும் நடக்கக்கூடாது என்று தேசிய வளர்ச்சி அமைச்சர் சீ ஹொங் டாட் வலியுறுத்தியுள்ளார்.
“நமது அரசியல் சிங்கப்பூரைப் பிரிக்கக்கூடாது, ஒன்றிணைக்க வேண்டும்,” என்றார் திரு சீ.
இவ்வாண்டு நடைபெற்ற சமூகத் தலைவர்கள் மாநாட்டில் சிறப்பு விருந்தினராகக் கலந்துகொண்ட அமைச்சர் சீ தமது கருத்துகளைத் தெரிவித்தார்.
சிங்கப்பூர் தேசியப் பல்கலைக்கழகத்தில் அக்டோபர் 25ஆம் தேதி ஷா அறக்கட்டளை முன்னாள் மாணவர் இல்ல அரங்கத்தில் நடைபெற்ற மாநாட்டில் கிட்டத்தட்ட 200 பேர் கலந்துகொண்டனர்.
சமூக ஊடகங்களின் பரவலான பயன்பாட்டையும், அதன்வழி சில நேரம் வரும் தவறான தகவல்கள் எவ்வாறு இன, சமய ஒற்றுமையைச் சீர்குலைக்கும் என்பதைப் பற்றியும் அமைச்சர் சீ எடுத்துரைத்தார்.
“தவறான தகவல்கள் மற்றும் போலிச் செய்திகளைப் பரப்பும் வலையில் விழுவதற்குமுன் சரியான கேள்விகளை எழுப்பவேண்டும். எது உண்மை, எது பொய் என்று தொடர்ந்து சரிபார்க்கவும்,” என்று அவர் கேட்டுக்கொண்டார்
‘சமூக ஒற்றுமை’ என்ற கருப்பொருளுடன் நடந்த மாநாட்டில் சமூக மற்றும் சமயத் தலைவர்கள், சமய நல்லிணக்க மன்ற (ஐஆர்ஓ) உறுப்பினர்கள், அடித்தளத் தலைவர்கள், இளையர்கள், ஆசிரியர்கள் போன்றவர்கள் பங்கேற்றனர்.
கலாசார, சமூக, இளையர்துறை அமைச்சின் ஆதரவுடன் ஒன்பீப்பள்.எஸ்ஜி அமைப்பும், கொள்கை ஆய்வுக் கழகமும் மூன்றாவது முறையாக இணைந்து இந்த மாநாட்டிற்கு ஏற்பாடு செய்தன.
தொடர்புடைய செய்திகள்
கல்வி, நீடித்த நிலைத்தன்மை, சுற்றுப்புற மூத்த துணை அமைச்சரும் ஒன்பீப்பள்.எஸ்ஜி அமைப்பின் தலைவருமான டாக்டர் ஜனில் புதுச்சேரி மாநாட்டின் இறுதியுரையை ஆற்றினார்.
ஏழாவது முறையாக நடைபெற்ற இம்மாநாட்டில் வழங்கப்பட்ட கொள்கை ஆய்வுக் கழகத் தரவுகளின்படி, சிங்கப்பூரில் இன, சமய நல்லிணக்கத்தின் நிலை காலப்போக்கில் கணிசமாக மேம்பட்டுள்ளதாக டாக்டர் ஜனில் குறிப்பிட்டார்.
“இருப்பினும், சிங்கப்பூர் அடையாளத்தைப் பற்றிய மற்றவர்கள் பார்வையை இனம், சமயம் எவ்வாறு பாதிக்கிறது என்பது போன்ற சிலவற்றில் நாம் தொடர்ந்து கவனம் செலுத்த வேண்டும்,” என்று செய்தியாளர்களிடம் அவர் கூறினார்.
இனம், சமயம் சார்ந்த ஆய்வுகளின் விளக்கக்காட்சிகளும், சமூக ஒற்றுமைக்கான சவால்கள், வாய்ப்புகள் குறித்த கலந்துரையாடலும் இடம்பெற்றன.