மாணவர் முரசு
இ-பேப்பர்
சிங்கப்பூர் இந்தியச் சமூகத்தினர் தங்களின் பண்பாட்டில் வேரூன்றியவர்கள் மட்டுமல்லர், நாட்டின் கட்டமைப்பிலும் ஆழமாக இழையோடி, தனித்துவமிக்க அடையாளம் கொண்டவர்கள் என்றும் அவர்கள் சிங்கப்பூர் வரலாற்றின் பெருமைமிகு முக்கியப் பங்காளர்கள் என்றும் பிரதமரும் நிதி அமைச்சருமான லாரன்ஸ் வோங் புகழாரம் சூட்டியுள்ளார்.
இந்திய மரபுடைமை நிலையத்தின் பத்தாவது ஆண்டுவிழா இரவு விருந்து நிகழ்ச்சி வெள்ளிக்கிழமை (நவம்பர் 14) நடைபெற்றது.
அதன் சிறப்பு விருந்தினராகப் பங்கேற்ற திரு வோங், அரசாங்கம் முதல் தொழில்துறைவரை, கலைகள் தொடங்கி விளையாட்டுவரை ஒவ்வொரு துறையிலும் இந்தியச் சமூகத்தின் நிலைத்த பங்களிப்புகள் குறித்து விவரித்தார்.
‘‘தொழில்முனைவோர், கொடையாளர் பி. கோவிந்தசாமிப் பிள்ளை, வறியோருக்குச் சேவையாற்றிட அமைப்பை நிறுவிய ஸ்ரீ நாராயண குருவின் சீடர்கள், இனம், மொழி, சமயச் சார்பற்ற, ஒன்றுபட்ட மக்களாகச் சிங்கப்பூரை உருவகப்படுத்தி, தேசிய உறுதிமொழியை வரைந்த முதல் வெளியுறவு அமைச்சர் எஸ். ராஜரத்தினம் உள்ளிட்ட முன்னோடிகள் சமூகத்தை மட்டுமல்லாமல் நாட்டையும் வடிவமைத்தவர்கள்,’’ என்றார் பிரதமர்.
“மரபுக்கு உயிரூட்டியவர்கள் இந்தியச் சமூகத்தினர். அதன் வரலாறு, கடந்து வந்த பாதை ஆகியவற்றைக் கூறுவதுடன், நாட்டின் அடையாளத்தில் எவ்வாறு அந்தப் பங்களிப்புகள் முக்கிய அங்கமாக மாறின என்பதை எடுத்துரைக்கவே இந்திய மரபுடைமை நிலையம் அமைக்கப்பட்டது,” என விழா அரங்கில் நினைவுகூர்ந்த திரு வோங், அந்த இலக்கை நிலையம் பத்தே ஆண்டுகளில் வியத்தகு வகையில் அடைந்துள்ளது என்றும் குறிப்பிட்டார்.
மேலும், “தமிழர்கள், சீக்கியர், செட்டி மலாக்காவினர், மலையாளிகள் என இந்தியச் சமூகத்தின் பன்முகத்தை வெளிக்காட்டி, ஒவ்வொரு குழுவின் அடையாளத்தைக் கொண்டாடுவதுடன், நாம் அனைவரும் பகிர்ந்துகொள்ளும் விழுமியங்களையும் நிலையம் எடுத்தியம்பியுள்ளது; மரபுகளுக்கு உயிர்கொடுத்து, அரங்கின் சுவர்களுக்கு அப்பால் அவற்றை எடுத்துச்சென்றுள்ளது. குறிப்பாக, பல்வேறு பின்னணிகளைக் கொண்ட சிங்கப்பூரர்களையும் நிலையம் சென்றடைந்துள்ளது,” என்றும் அவர் பாராட்டினார்.
மரபுடைமை நிலையம், மாணவர்கள் உள்பட ஏறத்தாழ 1.8 மில்லியன் வருகையாளர்களை வரவேற்றதாகக் குறிப்பிட்ட பிரதமர், குறிப்பாக அனைத்துப் பின்னணிகளையும் கொண்ட சிங்கப்பூரர்களை நிலையம் சென்றடைந்துள்ளது என்றும் பாராட்டினார்.
நமது பன்முகத்தன்மை ஒருபோதும் நம்மைப் பிரிக்கக்கூடாது என்று வலியுறுத்திய பிரதமர் வோங், ‘‘ஒவ்வொருவரும் மற்றவர்களின் கலாசாரத்தைக் கொண்டாடும்போது நமது பன்முகத்தன்மை, வலிமை மற்றும் ஒற்றுமையின் ஆதாரமாகத் திகழ்ந்திடும்,’’ என்றார்.
தொடர்புடைய செய்திகள்
‘‘ஆரம்பகாலக் குடியேறிகள், தீபாவளி, பொங்கல் முதல் தைப்பூசம் வரை துடிப்பான பழக்கவழக்கங்கள், உணவு வகைகள், கலைகள் மற்றும் பண்டிகைகளால் நம் சமூகத்தை வளப்படுத்தினர்,’’ என்று விவரித்த பிரதமர் வோங், இதன் தாக்கம் நாம் உண்ணும் உணவிலும், அதன் சுவையிலும் கலந்து நமது அன்றாட வாழ்வில் ஆழமாகப் பிணைந்துள்ளது என்றும் அவர்கூறினர்
’’நீங்கள் சிங்கப்பூரில் இருக்கும் இந்தியர்கள் மட்டுமல்லர். சிங்கப்பூர் இந்தியர்கள்; நாம் முதலில் சிங்கப்பூரர்கள்,” என்றார் திரு வோங்.
இவ்வேளையில், விழா தொடர்பாகத் தமிழ்முரசிடம் பேசினார் இந்திய மரபுடைமை நிலையத்தின் தலைவர் ஆர்.ராஜாராம். ‘‘இந்திய மரபுடைமை நிலையம் வெறும் காட்சிக்கூடமாக இல்லாமல் நினைவுகளும் அர்த்தமிகு வரலாறுகளும் நிலைத்து நிற்கும் வாழ்விடமாகத் திகழவேண்டும் என்ற இலக்குடன் தொடர்ந்து செயலாற்றும்,’’ என்று அவர் கூறினார்.