‘என்டியுசி இன்கம்’ நிறுவனத்தின் பயணக் காப்புறுதியை வாங்குவோருக்கு இப்போது கொவிட்-19 பாதுகாப்பும் கிடைக்கும்.
வெளிநாட்டில் இருக்கையில் கொவிட்-19 பாதுகாப்பு மற்றும் மருத்துவமனையில் தங்கி சிகிச்சை பெற நேர்ந்தால் அதற்கு ஆகும் செலவில் US$100,000 வரை பாதுகாப்பு கிடைக்க இந்த காப்புறுதி உதவும்.
அவர்கள் தேவை எனில் சிகிச்சைக்காக செல்வது அல்லது அவர்களைத் திருப்பி அனுப்புவது ஆகியவற்றுக்கு ஆகும் செலவில் US$100,000 வரைப்பட்ட பாதுகாப்பும் இதில் அடங்கும்.
இப்போது வாங்கப்படும் ஒருவழி பயணக் காப்புறுதித் திட்டங்களில் இந்த கொவிட்-19 நன்மைகள் எல்லாம் தானாகவே உள்ளடக்கப்படும்.
இருந்தாலும் இந்தக் காப்புறுதித் திட்டங்களை வாங்கும்போது, கொவிட்-19 கிருமித்தொற்று பாதிப்பு அதிகமாக இருக்கின்ற நாடுகள் என்று உலக சுகாதார நிறுவனம் பிரகடனப்படுத்தி இருக்கும் நாடுகளுக்கு மேற்கொள்ளப்படும் பயணங்களுக்கு இவை பொருந்தாது.
இன்கம் நிறுவனத்தின் இப்போதைய வருடாந்திர பயணக் காப்புறுதிப் பாதுகாப்புத் திட்டங்களை வைத்திருக்கும் சந்தாதாரர்கள், இந்த நிறுவனத்துடன் தொடர்புகொண்டு தாங்கள் இனிமேல் மேற்கொள்ள இருக்கும் பயணத்துக்கு கொவிட்-19 நன்மைகள் உண்டா என்பதைத் தெரிந்துகொள்ளலாம்.
இது பற்றி கருத்து தெரிவித்த இன்கம் நிறுவனத்தின் பயனீட்டாளர் துறைக்கான பொது நிர்வாகி ஃபேபியன் இங், பொதுவாக வெளிநாட்டுப் பயணங்கள் கட்டுப்படுத்தப்பட்டுள்ள போதிலும் சிலர் தொழில் நிமித்தமாக அல்லது வேறு ஏதேனும் அவசர தேவை காரணமாக வெளிநாட்டுக்குச் செல்லவேண்டிய நிலை இருக்கும் என்று கூறினார்.
இந்நிலையில், வெளிநாடு களுக்குச் செல்வோர் தேவையான அனைத்து முன்னெச்சரிக்கை நடவடிக்கைகளையும் மிக முக்கியமாக கருத வேண்டும் என்று அவர் வலியுறுத்தினார்.