மாணவர் முரசு
இ-பேப்பர்
சாங்கி விமான நிலைய பொது இடங்களில் உள்ள சில்லறை விற்பனைக் கடைகளில் பொருள்கள் வாங்குவோர் 2023ஆம் ஆண்டு முழுமைக்கும் 8% பொருள், சேவை வரி (ஜிஎஸ்டி) கட்டத் தேவையில்லை என்று தெரிவிக்கப்பட்டுள்ளது. ஜிஎஸ்டி வரும் ஜனவரி 1ஆம் தேதி முதல் ஏழு விழுக்காட்டிலிருந்து எட்டு விழுக்காட்டுக்கு உயரவிருக்கிறது.
இதற்குத் தகுதிபெற வாடிக்கையாளர்கள் சாங்கி ரிவார்ட்ஸ் உறுப்பினர் திட்டத்தில் (Changi Rewards membership programme) இலவசமாக சேரலாம்.
சாங்கி விமான நிலைய பொது இடங்களில் உள்ள சில்லறை விற்பனைக் கடைகளில் பொருள்கள் வாங்கும்போது, ஜிஎஸ்டி வரியை கடைகளே செலுத்திவிடும் என்று சாங்கி விமான நிலையக் குழுமம் (சிஏஜி) நேற்று தெரிவித்தது.
ஜிஎஸ்டி வரி விலக்கு ஜுவல் வளாகத்தில் உள்ள கடைகளிலும் உணவகங்களிலும் செல்லுபடியாகாது என்று தெரிவித்த சிஏஜி, சாங்கி ஈட்ஸ் இணையவழி உணவு விநியோகச் சேவை, பேரங்காடிகள் போன்ற இத்திட்டத்தில் சேராத இடங்களுக்கும் வரி விலக்கு இருக்காது என்றும் கூறியது.
ஜனவரி மாதத்தில் எட்டு நாள்களுக்கு (ஜனவரி 5 முதல் 8ஆம் தேதி வரை, ஜனவரி 12 முதல் 15ஆம் தேதி வரை) பொருள் களுக்கு 8% ஜிஎஸ்டி கழிவுடன் கூடுதலாக மேலும் 8% கழிவு வழங்கப்படும் என்று சிஏஜி சொன்னது.
இதற்குத் தகுதிபெற, வாடிக்கையாளர்கள் விலைக் கழிவுகளைத் தவிர்த்து குறைந்தது $30க்கு பொருள்களை வாங்கியிருக்க வேண்டும்.
"இந்தச் சலுகை, விழாக்காலத்தை வரவேற்கும் வாடிக்கையாளர்களுக்கு மகிழ்ச்சியை ஏற்படுத்தும் என நம்புகிறோம். இதுபோன்ற சலுகையை நாங்கள் 2009ஆம் ஆண்டிலிருந்து வழங்கி வருகிறோம்," என்றார் சிஏஜி குழுமத்தின் சலுகைகள் பிரிவின் பொது மேலாளர் போ ஹுய் ஹூன்.
சீனப் புத்தாண்டு விலைச் சலுகைகளையும் சாங்கி விமான நிலையம் அதன் பொதுவிட சில்லறை விற்பனைக் கடைகளில் நடத்தும்.
சாங்கி விமான நிலையத்தில் எந்தெந்தக் கடைகளில் ஜிஎஸ்டி வரி விலக்கு அளிக்கப்படுகிறது, எந்தெந்த கடைகளில் இருமடங்கு ஜிஎஸ்டி வரி விலக்கு அளிக்கப்படுகிறது என்பன போன்ற விவரங்களை www.changiairport.com/2xgst எனும் இணையப் பக்கத்தில் காணலாம்.