நாம் எனும் எண்ணமே மேலோங்க வேண்டும்: மசெக ஆர்வலர் ரமேஷ் செல்வராஜ்

ஒருவர் மேலே ஏற முயற்சி செய்யும்போது ஒருவரையொருவர் உயர்த்திக்கொண்டே போக வேண்டும். மாறாக மேலே ஏற முயற்சி செய்யும் ஒன்றைப் பிற நண்டுகள் கீழே இழுப்பது போன்ற சிந்தனை கூடாது. இப்படிப்பட்ட சிந்தனை முன்னேற்றம் அடைய விடாது என்று கூறினார் மக்கள் செயல்கட்சி ஆர்வலரும் தொண்டூழியருமான ரமேஷ் செல்வராஜ்.

ஞாயிற்றுக்கிழமை (நவம்பர் 9) நடந்த கட்சி மாநாட்டில், அனைவரையும் கொண்ட உள்ளார்ந்த தன்னலமற்ற சமூகத்தை வடிவமைக்க மசெக எவ்வாறு செயலாற்றலாம் என்பது குறித்துப் பேசிய அக்கட்சியின் நான்கு ஆர்வலர்களில் வழக்கறிஞரான திரு ரமேஷும் ஒருவர்.

உண்மையான வலிமை ஒருவரையொருவர் ஆதரிப்பதில்தான் உள்ளது என்றும், நம்மைச் சுற்றியிருப்பவர்கள் யாராக இருந்தாலும் அவர்களை உயர்த்தினால் நமது சமூகமே உயர்கிறது என்றும் அவர் கூறினார்.

நண்பர்கள் சிலருடன் சேர்ந்து தொடங்கிய ‘‘தாறுமாறு’’ எனும் ஓட்டக் குழுவைப் பற்றிச் சொன்ன அவர், பிறகு அது பலதுறைகளைச் சேர்ந்த 1,800க்கும் மேற்பட்ட உறுப்பினர்களைக் கொண்டதாகத் தற்போது வளர்ந்துள்ளது பற்றியும் பகிர்ந்து கொண்டார்.

‘‘சுகாதார நலனுக்காக மட்டும் அந்தம் ஓட்டம் அமையவில்லை; நன்கொடைத் திரட்டு, அறநிறுவனங்களை ஆதரிப்பது, ஒருவரையொருவர் ஊக்குவிப்பது எனப் பல்வேறு செயல்களை அதன்வழி செய்யமுடிகிறது,’’ என்றார் திரு ரமேஷ்.

இவ்வாறு ஒன்றிணைந்ததால் வெளிநாட்டு ஊழியர்கள், புதிய குடிமக்கள், இளையர்கள், மூத்தோர் என எந்த வேறுபாடுகளும் இல்லை என்று கூறிய அவர், ‘‘மக்களை ஒன்றிணைப்பது ஒருமைப்பாடு. நமது சமூகத்தில் முன்னேற்றம் வர வேண்டும் என்றால் போட்டியின்றி, சேர்ந்தே பயணம் செய்ய வேண்டும்,’’ என்றும் குறிப்பிட்டார்.