மாணவர் முரசு
இ-பேப்பர்
தேவைக்கேற்ப கட்டப்படும் (பிடிஓ) நான்கு வீடமைப்புத் திட்டங்களின்கீழ் மவுண்ட் பிளசெண்டில் ஏறக்குறைய 6,000 புதிய வீடுகள் கட்டப்படவிருக்கின்றன. இதற்குமுன் 5,000 வீடுகள் கட்டப்படும் என்று அறிவிக்கப்பட்டிருந்தது.
விரிவான ஆய்வுகளை நடத்தியதைத் தொடர்ந்து அந்த 33 ஹெக்டர் பரப்பளவிலான இடத்தில் கூடுதல் வீடுகளை உருவாக்க முடிவெடுத்ததாக வீடமைப்பு வளர்ச்சிக் கழகம் தெரிவித்தது. மவுண்ட் பிளசெண்ட் வட்டாரத்தில் இதற்குமுன் ஆறு பிடிஓ திட்டங்கள் இருக்கும் என்று கழகம் கூறியிருந்தது.
அக்டோபர் மாதத்தில் விற்பனைக்கு வரவிருக்கும் மவுண்ட் பிளசெண்ட் பேட்டையின் முதல் பிடிஓ திட்டத்தில், ‘வைட் ஃப்ளேட்ஸ்’ எனும் உட்சுவர் இல்லாத வீடுகளை வாங்குவதற்கான வாய்ப்பைப் பெறலாம்.
காலாங்/ வாம்போவில் உள்ள குரோஃபோர்ட் ஹைட்ஸ் திட்டத்தில் உள்ள வீடுகளுக்கு அடுத்தபடியாக மவுண்ட் பிளசெண்டில் உட்சுவர் இல்லாத வீடுகள் அறிமுகம் காண்கின்றன.
கடந்த ஆண்டு அக்டோபரில் அறிமுகம் செய்யப்பட்ட உட்சுவர் இல்லாத வீடுகளைப் பத்தில் நான்கு வாடிக்கையாளர்கள் தேர்வுசெய்ததாக வீடமைப்பு வளர்ச்சிக் கழகம் குறிப்பிட்டது.
எதிர்வரும் மவுண்ட் பிளசெண்ட் கிரெஸ்ட் திட்டத்தின்கீழ், ஈரறை, மூவறை, நான்கறை என 1,350 வீடுகள் கட்டப்படும். வீடுகளுக்கு அருகே பாலர் பள்ளி, உணவுக் கடைகள், பேரங்காடி ஆகிய வசதிகள் அமைந்திருக்கும்.
தோ பாயோ பேட்டையின் கீழ் வரும் மவுண்ட் பிளசெண்ட் கிரெஸ்ட் திட்டத்தில் 270 வாடகை வீடுகள் இருக்கும். திட்டத்தில் உள்ள இரண்டு புளோக்குகளில் வாடகை வீடுகள் ஒருங்கிணைக்கப்பட்டிருக்கும். ஒரு புளோக் முழுவதும் வாடகை வீடுகள் மட்டும் இருக்கும்.
திட்டம் பற்றிய கூடுதல் தகவல்கள் குறித்தும் அதன் வகைப்படுத்துதல் பற்றியும் அறிமுகத்தின்போது வெளியிடப்படும் என்று கழகம் சொன்னது.
தொடர்புடைய செய்திகள்
மவுண்ட் பிளசெண்ட் வட்டாரத்தில் உள்ள பிற மூன்று திட்டங்கள் பற்றி இனி வரும் ஆண்டுகளில் அறிமுகம் செய்யப்படும்.
நகரத்தின் விளிம்பில் இருப்பதால் மவுண்ட் பிளசெண்ட் திட்டம் முதன்மை வகுப்பின்கீழ் வரக்கூடும் என்று நிபுணர்கள் கணிக்கின்றனர்.
பிடாடாரியின் அளவில் மூன்றில் ஒரு பகுதியைக் கொண்டிருக்கும் மவுண்ட் பிளசெண்ட் பேட்டை, புக்கிட் பிரவுனுக்கும் மத்திய நீர்ப்பிடிப்பு இயற்கை வனப்பகுதிக்கும் அருகில் அமைந்துள்ளது.
அங்குதான் பழைய காவல்துறைப் பயிற்சிக் கழகம் 1929ஆம் ஆண்டிலிருந்து 2005ஆம் ஆண்டு வரை செயல்பட்டது.
அந்தப் பயிற்சிக் கழகத்தின் சில அம்சங்கள் எதிர்வரும் பேட்டையில் இணைக்கப்படும்.
