மாணவர் முரசு
இ-பேப்பர்
லண்டன்: ரசிகர்களால் மிகவும் கொண்டாடப்பட்ட காற்பந்து வீரர்களில் ஒருவரான பிரிட்டனின் டேவிட் பெக்கமிற்கு அந்நாட்டு அரசர் சார்ல்ஸ் ‘வீரத்திருமகன்’ பட்டம் வழங்கிச் சிறப்பித்துள்ளார்.
முன்னாள் இங்கிலாந்து அணித்தலைவரான பெக்கம் செவ்வாய்க்கிழமை (நவம்பர் 4) பெர்க்ஷியரில் உள்ள விண்ட்சர் அரண்மனையில் நடந்த நிகழ்ச்சியில் அவ்விருதைப் பெற்றுக்கொண்டார்.
இருபது ஆண்டுகளுக்கும் மேலாக காற்பந்து விளையாட்டிற்கு ஆற்றிய சேவைக்காகவும் அறப்பணிகளுக்காகவும் அவருக்கு அப்பெருமை கிட்டியது.
விருது நிகழ்ச்சிக்குத் தம் மனைவி விக்டோரியா வடிவமைத்த ஆடையை பெக்கம் அணிந்துசென்றிருந்தார். புகழ்பெற்ற ‘ஸ்பைஸ் கேர்ள்ஸ்’ பாப் இசைக் குழுவின் முன்னாள் உறுப்பினரான விக்டோரியா, இப்போது ஆடை வடிவமைப்பாளராக இருக்கிறார்.
தமக்கு ‘வீரத்திருமகன்’ விருது வழங்கப்படுவது குறித்த தகவலை அறிந்ததும் கண்ணீர்விட்டு அழுததாகக் கூறினார் 50 வயதான பெக்கம்.
“எங்கள் குடும்பத்திற்கு இது மிகப் பெரிய, மிகச் சிறப்பான நேரம்,” என்றார் அவர்.
தம் பிள்ளைகள் இனித் தம்மை ‘சர் தந்தையார்’ (Sir Dad) என அழைத்தாலும் அதனைப் பொருட்படுத்தப் போவதில்லை என வேடிக்கையாக அவர் சொன்னார்.
கிழக்கு லண்டனில் பிறந்தவரான பெக்கம், 1995ஆம் ஆண்டு மான்செஸ்டர் யுனைடெட் குழுவின்மூலம் இங்கிலிஷ் பிரிமியர் லீக் போட்டிகளில் அறிமுகமானார். அக்குழுவிற்காக அவர் ஆறுமுறை லீக் பட்டம், இருமுறை எஃப்ஏ கிண்ணம், ஒருமுறை சாம்பியன்ஸ் லீக் பட்டம் உள்ளிட்டவற்றை வென்றுள்ளார்.
தொடர்புடைய செய்திகள்
பின்னர் அவர் ரியால் மட்ரிட், லாஸ் ஏஞ்சலிஸ் கேலக்சி, ஏசி மிலான், பாரிஸ் செயின்ட் ஜெர்மேன் போன்ற உலகின் முன்னணிக் காற்பந்துக் குழுக்களுக்காகவும் விளையாடினார்.
இங்கிலாந்து அணிக்காக 115 போட்டிகளில் களமிறங்கிய பெக்கம், 2013ஆம் ஆண்டு ஓய்வுபெற்றார்.
பெக்கம்-விக்டோரியா இணையரின் சொத்து மதிப்பு 500 மில்லியன் பவுண்டு (S$671 மில்லியன்) என ‘2025 சண்டே டைம்ஸ் செல்வந்தர் பட்டியல்’ தெரிவிக்கிறது.
எவ்வளவு பேரும் புகழும் செல்வமும் ஈட்டியிருந்தாலும் தம் குடும்பமே தம்முடைய ‘ஆகச் சிறந்த சாதனை’ என்கிறார் பெக்கம்!