மாணவர் முரசு
இ-பேப்பர்
சென்னை: சென்னையின் புறநகர்ப் பகுதியான சிறுசேரிக்கு அருகே 50 ஏக்கர் பரப்பளவில், ரூ.5 கோடி செலவில் நகர்ப்புறக் காடுகளை உருவாக்கத் தமிழ்நாடு வனத்துறை நடவடிக்கை எடுத்துள்ளது.
சிறுசேரியில் சிப்காட் அருகிலேயே இந்த நகர்ப்புறக் காடுகள் உருவாக்கப்பட உள்ளன. அதற்கான ஒப்பந்தப்புள்ளி தற்போது கோரப்பட்டுள்ளது.
“முதலில் அப்பகுதியில் மரக்கன்றுகள் நடப்பட்டு பராமரிக்கப்படும். மேலும், அங்கு பொதுமக்களுக்கு வசதியாக பெஞ்சுகள், நடைபாதைகள் உள்ளிட்ட வசதிகளும் செய்து தரப்படும்,” என்று வனத்துறை அதிகாரிகள் கூறியுள்ளனர்.
சிறுசேரி அருகே ஏற்கெனவே வனப்பகுதி இருந்தது. அங்கு ஐடி நிறுவனங்கள் பெரியளவில் கட்டப்பட்டதால் வனப்பகுதி கடுமையாகப் பாதிக்கப்பட்டது. அதைத் தொடர்ந்தே இந்த முடிவு எடுக்கப்பட்டுள்ளதாகத் தெரிகிறது.
இந்தியாவின் வன ஆய்வு அறிக்கை 2021இன் படி, சென்னையில் 5.3 விழுக்காடு மட்டுமே காடு உள்ளது. மரங்கள் நிறைந்த வனப்பகுதிகள் இந்தளவுக்குக் குறைவாக இருப்பதும் வெப்பம் அதிகரிக்க முக்கிய காரணமாக இருக்கிறது. அடுத்து வரும் ஆண்டுகளில் இந்த நகர்ப்புறக் காட்டை உருவாக்கும் பணி முழுமையாக முடியும் எனத் தெரிகிறது. நகரில் பசுமைப் பகுதிகளை மீட்டெடுக்க மேலும் பல திட்டங்களைத் தமிழ்நாடு அரசு திட்டமிட்டு வருகிறது.
