மாணவர் முரசு
இ-பேப்பர்
கரூரில் செப்டம்பர் இறுதியில் நடந்த விஜய்யின் பிரசாரக் கூட்டத்தில் ஏற்பட்ட நெரிசலில் சிக்கி 41 பேர் உயிரிழந்ததைத் தொடர்ந்து, இறந்தவர்களின் குடும்பங்களுக்கு தமிழக வெற்றிக் கழகம் தலா ரூ.20 லட்சம் இழப்பீடு வழங்கியிருந்தது.
இந்நிலையில், உயிரிழந்த பெண் ஒருவரின் கணவர், ரூ.20 லட்சம் பணத்தைப் பெற்றுக்கொண்டு அதை வீணாக்கி வருவதாக அந்தப் பெண்ணின் தாயார் கண்ணீர் மல்கக் கூறியுள்ளார்.
சுதா என்ற இப்பெண்ணுக்கு நான்கு மகள்கள். அவர்களில் மூன்றாவது மகளான பிருந்தாவுக்கு திருமணம் நடந்து மூன்று ஆண்டுகளாகியும் கணவருடன் ஈராண்டுகளே வாழ்ந்தார். அவர்களுக்கு இரண்டரை வயதுப் பெண் குழந்தை உள்ளது.
விஜய்யின் பிரசாரக் கூட்டத்திற்குச் சென்ற பிருந்தாவின் உயிரிழப்புக்குப் பின்னர் அவருடைய உடலைப் பார்க்க கணவர் செல்லவில்லை. ஆனால், ரூ.20 லட்சம் பணம் கொடுக்கப் போவதாக அறிவிக்கப்பட்டதும், அரசு மருத்துவமனைக்குச் சென்ற அந்தக் கணவர், பிருந்தாவின் உடலைத் தரும்படி மாமியாருடன் சண்டை போட்டார். இரண்டரை வயதுக் குழந்தையையும் மாமியாரிடமிருந்து அவர் பறித்துச் சென்றுவிட்டார்.
செய்வதறியாது தவித்த அவரின் மாமியார், பேத்தியின் பெயரில் வங்கிக் கணக்கில் ரூ.20 லட்சம் பணம் போடும்படி கேட்டுக்கொண்டார். பணம் கிடைக்கும்வரை அமைதியாக இருந்துவிட்டு, இப்போது பேத்தி பெயரில் பணமெல்லாம் போட முடியாது என மருமகன் கூறிவிட்டார்.
அதுபற்றி கேட்டால் அவர் தம்மைத் தாக்குவதாக அச்சுறுத்துகிறார் என்றும் வேறொரு பெண்ணுடன் அவருக்குத் தொடர்பு உள்ளது என்றும் பிருந்தாவின் தாயார் கூறினார்.
இதனால், பேத்திக்குப் பயன்படாமல் பணம் வீணாவதாக அவர் வேதனை தெரிவித்தார். இதுதொடர்பாக காவல்துறையிடம் புகார் அளிக்கப்பட்டு ஆட்சியரிடம் மனு அளிக்கப்பட்டு உள்ளது. தொடர்ந்து விசாரணை நடந்து வருகிறது.
