மாணவர் முரசு
இ-பேப்பர்
ஸ்ரீரங்கம்: தமிழகச் சட்டமன்றத் தேர்தலில் ஸ்ரீரங்கம் தொகுதியில் திமுகவினரே அவர்களின் கட்சிக்கு வாக்களிக்கவில்லை என்ற அதிர்ச்சித் தகவல் சமூக ஊடகங்களில் பரவி வருகின்றன.
ஸ்ரீரங்கம் தொகுதியில் மொத்தம் 2,87,027 வாக்காளர்கள் உள்ளனர். தேர்தலுக்காக அமைக்கப்பட்டிருந்த 400க்கும் மேற்பட்ட வாக்குச்சாவடிகளில் 2,55,293 பேர் வாக்களித்தனர்.
இந்தத் தொகுதியில் தவெக வேட்பாளர் ரமேஷ் 1,03,235 வாக்குகள் பெற்று வெற்றி பெற்றார். மேலும், திமுகவின் துரைராஜ் 69,645 வாக்குகளும் அதிமுகவின் மனோகரன் 65,819 வாக்குகளும் பெற்றனர்.
இந்நிலையில், ஸ்ரீரங்கம் பெண்கள் பள்ளியில் அமைக்கப்பட்டிருந்த 91வது வாக்குச்சாவடியில் திமுக வேட்பாளருக்கு வெறும் ஐந்து வாக்குகள் மட்டுமே கிடைத்துள்ளன.
ஒவ்வொரு வாக்குச்சாவடிக்கும் வாக்குச்சாவடி முகவர்கள், இளைஞரணி நிர்வாகி, மகளிரணி நிர்வாகி எனத் தலா 14 பேரை நியமித்ததாக திமுக கூறியிருந்தது.
இதனிடையே, 91வது வாக்குச்சாவடியில் அக்கட்சிக்கு வெறும் 5 வாக்குகள் மட்டுமே பதிவாகின. அதாவது, அவர்களின் கட்சியினரே அவர்களுக்கு வாக்களிக்கவில்லை எனப் பொருளாகிறது.
இதுகுறித்து, திமுக நிர்வாகிகளிடம் கேட்டபோது, அந்த வாக்குச்சாவடியில் இருந்த திமுக நிர்வாகிகளே வாக்களிக்கவில்லையா அல்லது வேறு ஏதேனும் முறைகேடு நடந்துள்ளதா என விசாரிக்கப்பட்டு வருவதாகத் தெரிவித்தனர்.
