'தமிழைத் தேடி' ராமதாஸ் விரைவில் பயணம்

21 Jan 2023 - 5:30 am

2 mins read

சென்னை: தமிழ்நாட்டில் தமிழ் மொழி தொடர்பான அனைத்து கோரிக்கைகளையும் நிறைவேற்ற வலியுறுத்தி 'தமிழைத் தேடி' என்ற தலைப்பில் பரப்புரைப் பயணம் மேற்கொள்ளவிருப்பதாக பாமக நிறுவனர் ராமதாஸ் அறிவித்துள்ளார்.

"உலகின் மூத்த மொழியான தமிழின் இனிமை, பழமை, பெருமைகள், சிறப்புகள் ஆகியவை குறித்து மகிழ்ச்சி அடைய ஏராளமான செய்திகள் உள்ளன.

"ஆனால், தமிழ்நாட்டில் இன்று தமிழின் இருப்பு எவ்வாறு உள்ளது? என்பதை நினைக்கும் போதுதான் பெரும் கவலையும், வருத்தமும் வாட்டுகின்றன. தமிழ்நாட்டில் 'எங்கும் தமிழ்... எதிலும் தமிழ்' என்பதுதான் தமிழறிஞர்கள் மற்றும் தமிழ் உணர்வாளர்களின் நிலைப்பாடும், எதிர்பார்ப்பும் ஆகும். ஆனால், தமிழ்நாட்டில் 'எங்கே தமிழ்?' என்பதுதான் எதார்த்தம். தமிழில் பிறமொழிச் சொற்களின் கலப்பு, வணிக நிறுவனங்களின் பெயர்ப்பலகைகள் பிற மொழிகளில் எழுதப்படுதல், அரசு நிர்வாகத்திலும் கல்வி நிறுவனங்களிலும் தமிழுக்கு உரிய இடம் மறுக்கப்படுவது போன்றவை காலம் காலமாகவே தொடர்ந்து கொண்டுதான் இருக்கின்றன.

"ஆனால், அனைத்து இடங்களிலும் தமிழை நிலைநிறுத்த சட்டங்கள் இயற்றியும்கூட நிலைமை மாறாதது வலியை ஏற்படுத்துகிறது.

"தமிழ்நாட்டில் தமிழ் மொழி தொடர்பான அனைத்து கோரிக் கைகளை நிறைவேற்ற வலி யுறுத்தி, 'தமிழைத் தேடி' என்ற தலைப்பில் பரப்புரைப் பயணம் மேற்கொள்ளவிருக்கிறேன்.

"உலக தாய்மொழி நாளான பிப்ரவரி 21ஆம் நாள் சென்னை வள்ளுவர் கோட்டம் அருகில் தொடங்கும்.

"இந்த பரப்புரைப் பயணம் மது ராந்தகம், திண்டிவனம், புதுச்சேரி, கடலூர், சிதம்பரம், மயிலாடுதுறை, கும்பகோணம், தஞ்சாவூர் தமிழ்ப் பல்கலைக்கழகம், திருச்சி, திண்டுக்கல் வழியாக சங்கம் வைத்து தமிழ் வளர்த்த மதுரையில் வரும் பிப்ரவரி 28ஆம் நாள் நிறைவடையும்.

"தமிழறிஞர்கள், தமிழ் ஆர்வலர்கள், கல்வித்துறை, கலைத்துறை உள்ளிட்ட பல்வேறு துறையினர், மாணவர்கள், இளைஞர்கள், பொதுமக்கள் என அனைத்து தரப்பினரும் 'தமிழைத் தேடி' பரப்புரைப் பயணத்தில் பங்கேற்று ஆதரவளிக்குமாறு கேட்டுக்கொள்கிறேன்," என்று தனது அறிக்கையில் ராமதாஸ் தெரிவித்துள்ளார்.

இச்செய்தியைப் பகிரவும்