நியூயார்க் நகரிலுள்ள ஹட்சன் ஆற்றில் ஹெலிகாப்டர் ஒன்று விழுந்ததில் அதன் ஓட்டுநரும் அந்நேரத்தில் தரையில் இருந்த சரக்குப் பணியாளரும் (dockworker) இலேசாகக் காயமடைந்துள்ளனர்.
இந்தச் சம்பவத்தைக் காட்டும் படங்களும் காணொளிகளும் சமூக ஊடகங்களில் தீயெனப் பரவுகின்றன. இதில் மரணமும் கடுமையான காயங்களும் நேராதது குறித்து நிம்மதி அடைவதாகவும் பாதிக்கப்பட்டவர்களுக்குத் தக்க நேரத்தில் உதவி செய்த அதிகாரிகளுக்கு நன்றி தெரிவிப்பதாகவும் நியூயார்க் நகர மேயர் பில் டி பிலாசியோ டுவிட்டரில் கூறினார்.
ஹெலிகாப்டரை ஓட்டிய 34 வயது விமானியின் இடது கையில் சிறு காயம் பட்டதாக நியூயார்க் போலிஸ் அதிகாரிகள் செய்தியாளர்களிடம் தெரிவித்தனர். தன் மீது விழவிருந்த ஹெலிகாப்டரைக் கண்டு அதனிடமிருந்து தப்பிக்க சரக்குப் பணியாளர் பக்கவாட்டில் குதித்து விழுந்ததாகவும் அதனால் அவரது வலது கை மணிக்கட்டுப் பகுதியில் காயம் ஏற்பட்டதாகவும் கூறப்படுகிறது. சம்பவத்தின்போது ஹெலிகாப்டருக்குள் விமானியைத் தவிர வேறு எவரும் இல்லை என்றனர் போலிசார்.