வரி வசூல் கூடியது; நடப்பு நிதியாண்டில் குறையக்கூடும்

17 Oct 2020 05:45 | மாற்றம் செய்யப்பட்ட நாள் / நேரம்: 17 Oct 2020 14:45

2019-20 நிதியாண்டில் $53.5 பி.; நடப்பு ஆண்டில் 10% வரை குறையலாம் என கணிக்கப்படுகிறது...

சிங்கப் பூரில் கடந்த நிதி ஆண்டில் நிறுவனங்களும் தனிப் பட்டவர்களும் அரசாங்கத் திற்கு அதிக வரியைச் செலுத்தினார்கள். இருந்தாலும் கொவிட்-19 தொற்று காரணமாக நடப்பு நிதியாண்டில் வரிவசூல் குறையக்கூடும் என்று பகுப்பாய்வாளர்கள் எச்சரித்து இருக்கிறார்கள்.

சிங்கப்பூர் உள்நாட்டு வருவாய் ஆணையம் 2019-2020 நிதி ஆண்டில் $53.5 பில்லியன் வரி வசூலித்ததாகவும் இது அதற்கு முந்தைய ஓராண்டுடன் ஒப்பிடுகையில் 2.1 விழுக்காடு அதிகம் என்றும் ஆணையத்தின் வருடாந்திர அறிக்கை தெரிவிக்கிறது. அரசாங்க நடைமுறைச் செலவில் 72 விழுக்காட்டை இந்த வரி வசூல் ஈடுசெய்கிறது. சிங்கப்பூரின் மொத்த உள்நாட்டு உற்பத்தியில் இது 10.5 விழுக்காட்டிற்குச் சமம்.

இதனிடையே, இந்த நிதி ஆண்டில் மொத்த வரி வசூல் ஏறக்குறைய 10% குறையக்கூடும் என்று எதிர்பார்க்கப்படுவதாக மேபேங்க் கிம் எங் மூத்த பொருளியல் வல்லுநர் சுவா ஹாக் பின் தெரிவித்து இருக்கிறார். பொருளியல் இறங்குமுகம் காரணமாக நிறுவனங்கள் செலுத்தும் வருமான வரி வசூலும் ஜிஎஸ்டி வரி வசூலும் குறையும்.

முத்திரை தீர்வை அந்த அளவுக்குக் குறையாது என்றும் அவர் தெரிவித்துள்ளார். சிங்கப்பூர் தன்னுடைய பொருளியல் -5 விழுக்காடு முதல் -7 விழுக்காடு வரை குறையக்கூடும் என்று முன்னுரைத்து இருக்கிறது. ஏறக்குறைய 20 ஆண்டுகளில் இந்த அளவுக்குப் பொருளியல் படுமோசமாக இருந்ததில்லை.

துணைப் பிரதமர் ஹெங் சுவீ கியட் வியாழக்கிழமை நாடாளுமன்றத்தில் இந்த ஆண்டு ஜிஎஸ்டி வரி வசூல், தொடக்க மதிப்பீட்டைவிட 14% குறையும் என்று கணக்கிடப்பட்டு இருப்பதாகக் கூறினார். பயணங்கள் தடைபட்டு இருப்பதும் கொவிட்-19 காரணமாக அமல்படுத்தப்பட்ட கட்டுப்பாடுகளும் இதற்குக் காரணம். மேலும் சில ஆண்டுகளுக்கு ஜிஎஸ்டி வரி வசூல் வழக்கத்தைவிட குறைவாகவே இருந்து வரும் என்றும் தெரிகிறது.

சிங்கப்பூரில் அரசாங்கத்திற்குச் சேரும் வரியில் வருமான வரியே அதிகம். இந்த வரி, மார்ச் 31ல் முடிவுற்ற 12 மாத காலத்தில் $30.8 பில்லியனாக இருந்தது. இந்த வரியில் நிறுவனங்கள் செலுத்தும் தொகையும் தனிநபர்கள் செலுத்தும் தொகையும் அடங்கும். ஆண்டுக்காண்டு அடிப்படையில் நிறுவனங்கள் செலுத்திய வரி 4.3 விழுக்காடு கூடி $16.7 பில்லியனாக இருந்தது. தனிநபர் வரி வசூல் 5.7 விழுக்காடு கூடி $12.4 பில்லியனாகியது. அடுத்த படியாக ஜிஎஸ்டி மூலம் அரசாங்கத்திற்கு அதிக வருவாய் கிடைக்கிறது. மொத்த வரி வசூலில் 21% ஜிஎஸ்டி வரி. இது 0.2% கூடி $11.2 பில்லியனாக ஆகி இருக்கிறது.