கட்டுமானப் பணிகளுக்காக இடம் மாறும் ஜூரோங் பேருந்து நிலையம்

ஜூரோங் வட்டாரப் பாதை, ஜூரோங் ஈஸ்ட் ஒருங்கிணைந்த போக்குவரத்து மையத்தின் கட்டுமானப் பணியை முன்னிட்டு, ஜூரோங் ஈஸ்ட் பேருந்து நிலையம் வரும் டிசம்பர் 6ஆம் தேதி முதல் வேறு இடத்துக்கு மாற்றப்படுகிறது.

தற்போதைய பேருந்து நிலையத்துக்கு எதிர்புறம், ஜூரோங் கேட்வே ரோடு/ ஜூரோங் ஈஸ்ட் ஸ்திரீட் 12 ஆகியவற்றுக்கு மற்றும் ஜூரோங் கேட்வே ரோடு/ ஜூரோங் ஈஸ்ட் சென்ட்ரல் 1 ஆகிய இரு சந்திப்புகளுக்கு இடையே ஜூரோங் கேட்வே ரோட்டில் புதிய பேருந்து நிலையம் அமைகிறது.

ஜூரோங் ஈஸ்ட் ஒருங்கிணைந்த போக்குவரத்து மையம் 2027ஆம் ஆண்டில் கட்டி முடிக்கப்படும் வரை இந்த புதிய இடத்தில் பேருந்து நிலையம் செயல்படும் என நிலப் போக்குவரத்து ஆணையம் இன்று (நவம்பர் 11) தெரிவித்தது.

பாதசாரிகள் பயன்பாட்டுக்காக, மின்தூக்கிகள், நகரும் படிக்கட்டுகள் போன்ற வசதிகளுடன் பாலம் ஒன்று ஜூரோங் கேட்வே ரோட்டில் அமைக்கப்பட்டுள்ளது. ரயில் நிலையம், பேருந்து நிலையம் ஆகியவற்றுக்கிடையே வசதியாக பயணிகள் சென்று வர இந்த ஏற்பாடு.

ஜெம் மாலுக்கு எதிரில் புதிய ஒரு பேருந்து நிறுத்தமும் பயணிகள் வசதிக்காக அமைக்கப்படும்.

பேருந்துச் சேவை எண்கள் 78, 79 ஆகியவை மாற்று பேருந்து நிறுத்தங்களிலிருந்து சேவையைத் தொடங்கும்.

பாதிக்கப்பட்ட பேருந்து நிறுத்தங்களிலும் பேருந்து நிலையங்களிலும் கூடுதல் விவரங்கள் பார்வைக்கு வைக்கப்படும்.