கொரோனா கிருமிக்கு எதிரான தடுப்பூசிகளின் முதல் தொகுதி நேற்று காலை செப்பாங்கில் உள்ள கோலாலம்பூர் அனைத்துலக விமான நிலையத்தை அடைந்தது. மேலும் சில, நிலம்வழியாக சிங்கப்பூரிலிருந்து ஜோகூருக்குள் நேற்று பிற்பகல் வந்தன.
பெல்ஜியத்தின் ஃபைசர் ஆலையிலிருந்து மொத்தம் 312,390 தடுப்பூசி அளவுகள், லாய்ப்சிக், ஜெர்மனி, சிங்கப்பூர் உட்பட பல இடங்களில் இடையிடையே நின்று இறுதியில் மலேசியாவை அடைந்தன.
மலேசியாவில் அமைந்துள்ள 16 இடங்களில் தடுப்பூசிகள் ரகசியமாக வைக்கப்படும் என்று தெரிவிக்கப்பட்டது. சிங்கப்பூரிலிருந்து ஜோகூருக்குள் வரும் தடுப்பூசிகள், அங்குள்ள நான்கு ரகசிய இடங்களில் வைக்கப்படும்.
இதற்கிடையே, மலேசியாவின் கொவிட்-19 தடுப்பூசித் திட்டத்தை முன்னெடுத்துச் செல்லும் பொறுப்பில் உள்ள அறிவியல், தொழில்நுட்ப, புத்தாக்க அமைச்சர் கைரி ஜமாலுதீன், தடுப்பூசித் திட்டத்தைக் குறித்துச் செய்தியாளர்களிடம் நேற்று பேசியிருந்தார்.
தேசியத் தடுப்பூசித் திட்டம் சற்று முன்னதாகவே, பிப்ரவரி 26ஆம் தேதி முதல் தொடங்கவுள்ளதாக அவர் கூறினார்.
இதன்படி, பிரதமர் முகைதீன் யாசினும் சுகாதார தலைமை இயக்குநர் நூர் ஹிஷாம் அப்துல்லாவும் முதலில் தடுப்பூசியைப் போட்டுக்கொள்வர் என்று அவர் தெரிவித்தார். அமைச்சரவைக் கூட்டத்திற்குப் பிறகு இருவரும் தங்களின் முதல் தடுப்பூசியைப் போட்டுக்கொள்வர் என்றார்.
தடுப்பூசித் திட்டத்தின் முதல் கட்டமாக பெரும்பாலும் சுகாதாரப் பராமரிப்பு ஊழியர்களை உள்ளடக்கும் அரை மில்லியன் முன்களப் பணியாளர்களுக்குத் தடுப்பூசிப் போட்டுக்கொள்ள முன்னுரிமை வழங்கப்படும். இதையடுத்து, தொற்று ஏற்படும் சாத்தியம் அதிகமுள்ள நபர்களுக்குத் தடுப்பூசி வழங்கப்படும். பிறருக்கு அதன் பின்னர் தடுப்பூசி போட்டுக்கொள்ளும் வாய்ப்பு கிட்டும். அடுத்த ஆண்டு பிப்ரவரி மாதத்திற்குள் குறைந்தது 80% மக்களுக்குத் தடுப்பூசி போடுவதை மலேசியா இலக்காகக் கொண்டுள்ளது.
இதற்கிடையே, தடுப்பூசியைப் போட்டுக்கொண்டோருக்கு ‘உலகளாவிய சான்றளிப்பு’ வழங்குவது குறித்து சிங்கப்பூரின் போக்குவரத்து அமைச்சர் ஓங் யி காங்குடன் மலேசிய போக்குவரத்து அமைச்சர் வீ கா சியோங் பேசியிருப்பதாகக் கூறப்பட்டது. இச்சான்றளிப்பால் இரு நாடுகளுக்கிடையேயும் வட்டாரத்தின் மற்ற நாடுகளுக்கும் தடுப்பூசி போட்டுக்கொண்டவர்கள் பயணம் செய்ய முடியும் என்று கூறப்படுகிறது.
இதனால் மலேசியாவுடன் வட்டார நாடுகளின் விமானத்துறை மீண்டும் தலைதூக்கும் என்று எதிர்பார்க்கப்படுகிறது.